На выбарах у Латвіі перамагла расейскамоўная партыя «Згода» (абноўлена)
На выбарах у Сойм Латвіі перамагла сацыял-дэмакратычная партыя „Згода”, якая прадстаўляе інтарэсы расейскамоўных жыхароў краіны, на чале з першым расейскім мэрам Рыгі Нілам Ушаковым.
Паводле дадзеных Цэнтральнай выбарчай камісіі краіны, пасля падліку 98% выбарчых бюлетэняў за „Згоду” прагаласавалі звыш 23% выбаршчыкаў. Аб’яднанне „Адзінства” атрымала амаль 22%.
Тройку лідараў замыкае аб’яднанне Саюз зялёных і сялян. За яго прагаласавалі амаль 20 % выбаршчыкаў.
Усяго ў заканадаўчы орган краіны праходзяць шэсць палітычных сілаў. Выбарчая яўка была невысокай і склала ўсяго 58%. Гэта ўжо чарговая перамога ў парламенцкіх і мясцовых выбарах пракрамлёўскай партыі “Згода”. Аднак, пасля выбараў у 2011 годзе яна не магла стварыць ураду, таму што не змагла стварыць кааліцыі.
Беларускае Радыё Рацыя
* * *
Апазіцыйную партыю „Згода”, якая бароніць інтарэсы расейскамоўнага насельніцтва, падтрымалі 23% выбаршчыкаў, на другім і трэцім месцах кіроўныя партыі „Адзінства” – 21% і Саюз зялёных і сялян – амаль 20%.
Пасля падліку бюлетэняў з 1000 участкаў з 1054 на выбарах у 12-й сойм таксама праходзяць Нацыянальнае аб’яднанне „Усё – Латвіі”, якое набірае 16% галасоў выбаршчыкаў, і дзве новыя партыі – „Ад сэрца – Латвіі” і Латвійскае рэгіянальнае аб’яднанне.
Па разліках экспертаў, „Згода” можа прэтэндаваць на 25 дэпутацкіх месцаў у сойме са 100.
Фота Reuters
