Міхась Скобла ў „Цудоўні” сустракаўся з гарадзенцамі
У гарадзенскай этна-краме „Цудоўня” прайшла творчая вечарына і прэзентацыя дзвух кніжак вядомага беларускага літаратара, журналіста Міхася Скоблы. Адна з іх „Саркафагі страху” – кніга артыкулаў, эсэ і нарысаў.
Міхась Скобла кажа пра гэтае выданне:
– Героі кнігі эсэ – гэта Ларыса Геніюш, Уладзімір Някляеў, Рыгор Барадулін, Данута Бічэль, Юрка Голуб, Хрысціна Лялько. Толькі адных гарадзенцаў, я гляджу, добры тузін назбірваецца. У гэтай кнізе заўважны яшчэ ўкраінскі акцэнт. Там 6 эсэяў звязаны з украінскай тэматыкай. Можа таму гэтую кнігу заўважылі ў Кіеве і прыканцы мінулага году адзначылі міжнароднай літаратурнай прэміяй „Воін святла”.
Другая кніжка Міхася Скоблы – гэта зборнік паэзіі „Камізэлька для месяца”. Некалькі сваіх вершаў прагучалі ў зале этна-крамы з вуснаў паэта.
Чаму паэтычная мова ніколі не старэе? Бо яна лаканічная і глыбокая паводле сэнсавага азначэння, – заўважае аўтар нашаму радыё.
– Вось вам прыклад: „стралковая рота сотку ўзяла, над намі зямля, пад намі зямля”. Васіль Быкаў на гэтую тэму напісаў бы аповесць. А паэт сказаў у двух радках. Таму гэта карацей за ўсялякія кампутарныя новамовы і праграмы. У паэзіі, як мне здаецца, прыўкрасная, як сказаў бы аўтар рамана „Хрыстос прызямліўся ў Гародні”, будучыня.
У выдадзеных праз рэдагаванне Міхася Скоблы кнігах вялікае месца займаюць адшуканыя ў архівах малавядомыя, або зусім невядомыя творы, успаміны, лісты.
На вечарыне Міхась Скобла падзяліўся сваім намерам ужо ў гэтым годзе выдаць кнігу пра радавод князёў Сапегаў, якія калісьці валодалі родным Міхасю Скоблу Дзярэчынам.
[Not a valid template]Якуб Сушчынскі, Беларускае Радыё Рацыя
Фота аўтара
