Аляксандр Бухвостаў: Карціна не такая вясёлая, як яе малююць
Прафсаюзны лідар Аляксандр Бухвостаў распавядае пра тое, як дзяржава “працаўладкавала” беларусаў.
Як вядома, перад чыноўнікамі была пастаўлена задача разабрацца з уладкаваннем усіх беспрацоўных да 1 траўня. Міністр працы і сацыяльнай абароны Ірына Касцевіч, як вядома, ужо адрапартавала: маўляў, усе, хто хацеў знайсці працу, яе знайшоў. Ці адпавядаюць словы рэчаіснасці?
Аляксандр Бухвостаў: Калі я слухаў заяву міністра працы, то разумеў, што інакш яна і не можа сказаць. Нам і пра заробкі ў 500 даляраў штодня даводзяць, і пра працаўладкаванне беспрацоўных… Але карціна далёка не такая вясёлая, як яе малююць. Па-першае, трэба глядзець, якія працоўныя месцы прапаноўваюць людзям. Большая палова вакансій прапаноўваецца з заробкам, які ніжэй за мінімальны спажывецкі бюджэт. Таму нават тыя, хто пагадзіўся на такія ўмовы, адразу трапляюць у паласу беднасці. І гэтае працаўладкаванне праблему людзей не вырашае. А ўсе гучныя заявы, што пытанне вырашана, – своеасаблівы блеф. Складана верыць і статыстыцы, і заявам чыноўнікаў, таму што быў загад, і ўсім трэба адрапартаваць, што ён выкананы.
РР: Ці будзе расці беспрацоўе ў бліжэйшы час?
Аляксандр Бухвостаў: Пакуль у краіне малая дапамога па беспрацоўі, многія не ідуць на біржу, а таму карціна па беспрацоўі застаецца недакладнай. Але ж ні для каго не скарэт, што за апошнія два гады беларуская прамысловасць згубіла каля 20-25 тысяч працоўных. Куды пайшлі гэтыя людзі? Працаўладкаваліся? Не працуюць? Цяжка сказаць. Відавочна, што для падвышэння эфектыўнай працы прадпрыемствам трэба скарачаць штат, але з іншага боку ніякіх інавацый практычна не з’яўляецца. А як можа падвышацца вытворчасць працы, калі няма новых тэхналогій? Таму, на мой погляд, сітуацыя з беспрацоўем будзе захоўвацца ў кансерватыўнай форме. Ва ўсялікім выпадку, у летнія месяцы. А далей прагнозы носяць больш песімістычны характар. Наўрад ці эканоміка пачне выходзіць з крызіса.
Кастусь Заблоцкі, Беларускае Радыё Рацыя
