„Моладзь БНФ” усклала кветкі да магілы Васіля Быкава
Моладзь БНФ, а таксама жыхары Менску, усклалі кветкі да магілы пісьменніка-франтавіка Васіля Быкава.
Пасля хвіліны маўчання кіраўнік моладзевага крыла Партыі БНФ Юры Лукашэвіч сказаў, што 8 траўня – дзень памяці і прымірэння. І ў гэты дзень вельмі важна прыйсці на магілу менавіта Васіля Быкава.
– Гэта не толькі франтавік, літаратар, але, што вельмі важна для нас, адзін з заснавальнікаў БНФ. І вельмі важна аддаваць даніну памяці гэтаму вялікаму чалавеку. Але сённяшняй акцыяй мы не толькі аддалі даніну памяці яму, але і ўсім загінулым у Другой сусветнай вайне.
Прадстаўнікі ўлады за амаль 14 год, якія прайшлі з дня смерці Васіля Быкава, так і не прыйшлі да яго магілы, каб ускласці кветкі і аддаць даніну памяці чалавеку, які не толькі абараняў радзіму са зброяй у руках, але сумленна, праўдзіва распавёў аб позвігу і аб трагедыі народу, – зазначыў Лукашэвіч.
Генадзь Барбарыч, Беларускае Радыё Рацыя
