Ва Украіне заблакуюць доступ да «Укантакце» і «Аднакласнікаў»
Прэзідэнт Украіны Пятро Парашэнка падпісаў указ пра новыя санкцыі супраць Расеі, якія прадугледжваюць, у прыватнасці, блакаванне доступу да сацсетак «Укантакце» і «Аднакласнікі». Акрамя гэтага, доступ будзе заблакаваны да ўсіх сервісаў «Яндэкса». Тэкст указа апублікаваны на афіцыйным сайце кіраўніка дзяржавы.
Доступ да сацсетак заблакаваны ў рамках абмежаванняў, накладзеных на Mail.Ru Group. Правайдары таксама павінны будуць заблакаваць доступ да сайта Mail.ru.
Блакаваныя таксама будуць сайты антывірусных кампаній «Лабараторыя Касперскага» і DrWeb.
Эканамічныя санкцыі (блакаванне актываў, забарону на транзакцыі і вяшчанне) таксама ўведзеныя супраць найбуйнейшых расейскіх тэлекампаній: «ТВ Цэнтр», РБК, ВГТРК, «НТВ-Плюс», «Звезда», ТНТ, РЕН, ОТР.
***
«Яндэкс», «Укантакце» і «Аднакласнікі» – лідзіруючыя па наведвальнасці сайты ўкраінскага сегмента інтэрнэту. Для «Укантакце» Украіна з’яўляецца другім па памеры рынкам пасля расейскага.
Паводле meduza.io
