Фэст “Разам” аб’яднаў грамадскіх актывістаў з трох раёнаў Віцебшчыны
Фэст “Разам” на Лепельшчыне аб’яднаў грамадскіх актывістаў з трох раёнаў Віцебшчыны. Туды з’ехаліся аматары беларускасці, каб патанчыць, паспяваць, паўдзельнічаць у паганскім абрадзе ў гонар багоў Велеса і Мокашы, пазнаёміцца ды проста адпачыць.
Па словах аднаго з арганізатараў фэсту Андрэя Каротчыка, гэты паганскі абрад праводзіцца як даніна і падзяка зямлі.
— Абрад старажытны, звычайна праводзіцца на праваслаўнага святога Мікалая, а па паганскім календары гэта будзе дзень Велеса і Мокашы. Калі святкуецца дзень зямлі нават нельга было араць, капаць ды турбаваць яе. А выказваць ёй падзяку і пашану за тое, што яна нас спарадзіла, дае нам жыццё, мы з яе пачынаем і зноў у яе вяртаемся.
Другі год запар фэст “Разам” на сваёй сядзібе ў Малых Пышнагорах ладзіць лепельскі грамадскі актывіст Зміцер Судак разам са сваімі аднадумцамі. Падчас сёлетняга фэсту арганізатары нават уручылі статуэтку “Узнагарода літвінаў-2017” настаўніку гісторыі і краязнаўцу з Лепельшчыны Валеру Тухта.
Таццяна Смоткіна, Беларускае Радыё Рацыя
Фота аўтара
