Малдова выслала пецярых расейскіх дыпламатаў
Малдова вырашыла выслаць пецярых супрацоўнікаў расейскай амбасады, паведамляе выданне NewsMaker.
Амбасадар Расеі Фарыд Мухаметшын заявіў, што малдаўскія ўлады апавясцілі пра гэта 29 траўня ў другой палове дня.
Дыпламаты павінны пакінуць краіну на працягу сутак.
Па звестках NewsMaker і „Інтэрфакса”, сярод дыпламатаў, якіх вырашылі выслаць, памочнік ваеннага аташэ Аляксандр Грудзін.
У сакавіку 2017 года ў Малдове затрымалі былога дэпутата парламента Юрыя Балбачана. Па версіі пракуратуры, ён перадаваў Грудзіну сакрэтную інфармацыю. На яго завялі справу аб шпіянажы і здрадзе радзіме.
