Уніяты адзначылі Дзень Усіх Беларускіх Святых
Адразу ў трох мясцінах – Гародні, Адамавічах і форце №2, што ў Навумавічах, – гарадзенскія грэка-каталікі малітоўна ўзгадалі святых беларускага народа, якія неслі асвету, культуру, праяўлялі самаахвярнасць за вялікі перыяд хрысціянскай гісторыі.
[Not a valid template]
Айцец Андрэй Крот кажа, чаму сярод першых святых беларускага народа няма мажнаўладцаў.
– Нашы святыя неслі святасць, хрысціянства да нас праз сваё пабожнае жыццё і асвету. І гэта для нас, беларусаў, сёння надзвычай важна. Мы павінны жыць па прыкладзе гэтых святых і тыя першыя крокі святасці ў нашым народзе Ефрасінні Полацкай і Кірылы Тураўскага памятаць, з чаго пачыналася наша святасць: з уласнага хрысціянскага жыцця і асветы.
На завяршэнне Дня Усіх Беларускіх Святых сярод гарадзенскіх грэка-каталікоў традыцыйна праводзіцца малітоўнае спатканне ля форта №2, што ля вёсцы Навумавічы. Там у час Другой сусветнай вайны нямецкія карнікі расстралялі мноства мірных жыхароў Гародні і ваколіцаў. Сярод загінулых іх аднаверніца, бласлаўлёная Мар’яна Бярнацкая. Кажа ўдзельнік малітвы Валер.
– Гэта жанчына, якая была грэка-каталічкай, загінула ў час вайны. Яна загінула за сваю сям’ю, за цяжарную нявестку. Таму яна прылічана да блаславёных. І гэтае ўшанаванне – знак павагі да яе ўчынку і яе жыцця.
На месцы расстрэлу цяпер усталяваны знакі памяці: мармуровы крыж і табліца з пералікам усіх загінулых.
Якуб Сушчынскі, Беларускае Радыё Рацыя, Гародня
