Беларускія валейбалісткі завяршылі выступленне ў Еўралізе
Беларускія валейбалісткі ў заключным матчы ў групе А ў розыгрышы Еўралігі ўступілі камандзе Фінляндыі з лікам 0:3 (21:25, 23:25, 25:27).
Матч адбыўся ў „Чыжоўка-Арэне” і атрымаўся складаным для падапечных Аляксандра Клімовіча. Перамога пакідала ім шанц на выхад у паўфінал турніру. Аднак фінскія валейбалісткі тактычна дакладна правялі сустрэчу, выкарысталі сваю перавагу на падачы мяча, упэўнена згулялі ў абароне. У выніку госці дабіліся перамогі, завяршыўшы выступленне ў групе без адзінага паражэння. Найбольш рэзультатыўным іграком матчу стала фінская нападаючая Пія Кархонен (23 ачкі), у гаспадароў пляцоўкі ў атацы вызначылася Настасся Гарэлік (13 ачкоў).
Турнірнае становішча групы А: 1. Фінляндыя – 6 перамог (18 ачкоў/6 матчаў). 2. Беларусь – 3 (9/6). 3. Албанія – 2 (6/6). 4. Аўстрыя – 1 (3/6).
Зборная Беларусі выступіла на турніры без некалькіх ключавых ігракоў, прадастаўляючы шанц праявіць сябе іншым валейбалісткам, якія прэтэндуюць на тое, каб трапіць у склад на галоўны старт сезона – асенні чэмпіянат Еўропы, які пройдзе з 20 верасня па 1 кастрычніка ў Грузіі і Азербайджане. Жаночая зборная Беларусі восенню выступіць на гэтым турніры ў групе В. Матчы адбудуцца ў Тбілісі. Сапернікамі беларускай каманды стануць зборныя Італіі, Харватыі і Грузіі.
