У Беларусі створаць Цэнтр часовага ўтрымання нелегальных мігрантаў
Цалкам цэнтр для нелегалаў будзе гатовы праз 5 год, паведаміў на прэс-канферэнцыі ў Менску прадстаўнік Міністэрства ўнутраных спраў Аляксандр Татура. Зараз праект праходзіць працэдуру ўнутрыдзяржаўнага ўзгаднення.
– Плануецца пачаць рэалізцыю гэтага праекта ў 2017 годзе. Тэрмін рэалізацыі – цягам 5-ці год. Рэспубліка Беларусь вядзе перамовы па падпісанні дамовы па рэадмісіі з краінамі ЕЗ. Фактычна, будаўніцтва такога цэнтра абумоўлена ў тым ліку і падпісаннем дамовы па рэадмісіі.
Татура распавёў, хто менавіта патрапіць у такі цэнтр.
– Па-першае, гэта асобы, якія будуць затрымлівацца за незаконнае перасячэнне мяжы. Акрамя таго, у гэтым цэнтры будзе прадугледжана размяшчэнне пэўнай колькасці асоб, якія маюць намер звярнуцца з хадайніцтвам аб прадастаўленні міжнароднай абароны на тэрыторыі Рэспублікі Беларусь. Прадугледжваецца толькі станоўчы эфект. Доказам таму з’яўляецца практыка іншых краін, якія стваралі такія цэнтры на сваёй тэрыторыі.
Кошт праекта – 7 мільёнаў еўра, грошы на Цэнтр часовага ўтрымання нелегальных мігрантаў накіроўвае Еўразвяз у межах праграмы міжнароднай тэхнічнай дапамогі.
Сяргей Залескі, Беларускае Радыё Рацыя, Менск
Фота grodno-best.info
