Беларусы пачалі часцей набываць білеты на цягнікі праз інтэрнэт
Беларуская чыгунка з пачатку года павялічыла продаж білетаў праз інтэрнэт на чвэрць.
У выніку маніторынгу, які праводзіцца чыгункай з пачатку 2017 года, устаноўлены продаж мільённага электроннага білета на сайце сістэмы продажу праязных дакументаў poezd.rw.by. Білет набыты 1 ліпеня на цягнік рэгіянальных ліній бізнес-класа па маршруце Івацэвічы — Берасце, паведаміла прэс-служба чыгункі.
„Павелічэнню продажу праязных дакументаў праз інтэрнэт садзейнічае праца, што праводзіцца Беларускай чыгункай, па ўдасканаленні сістэмы продажу”, — лічыць прэс-служба. З дапамогай гэтай сістэмы з пачатку 2017 года на сайце чыгункі аформлена больш за 1 мільён 10 тысяч праязных дакументаў, што на 25% больш, чым за аналагічны перыяд 2016 года. Удзельная вага продажу білетаў праз інтэрнэт (ад агульнай колькасці праязных дакументаў, аформленых праз АСК „Экспрэс” у білетных касах Беларускай чыгункі) павялічыўся з 12% у студзені—чэрвені 2016 года да 17% у 2017 годзе.
На працягу апошніх гадоў БЧ вызначае мільённага інтэрнэт-пасажыра: у 2014 годзе ён быў зафіксаваны ў снежні, у 2015-м — у верасні, у 2016-м — у жніўні, а ў 2017 годзе продаж мільённага электроннага білета на сайце сістэмы продажу праязных дакументаў poezd.rw.by усталяваны ўжо ў ліпені.
З улікам росту попыту на продаж білетаў праз інтэрнэт Беларуская чыгунка прагназуе, што да канца года можа быць дасягнуты двухмільённы рубеж.
Паводле Белапан
