Дзяржкаммаёмасць вызначыла самыя дарагія землі ў Беларусі
Самыя дарагія землі ў Беларусі вызначаныя паводле вынікаў кадастравай ацэнкі, праведзенай Дзяржаўным камітэтам па маёмасці.
Як паведаміла прэс-служба ведамства, у маі 2017 года ДУП „Нацыянальнае кадастравае агенцтва” Дзяржкаммаёмасці завяршыла работы па кадастравай ацэнцы зямель па відах функцыянальнага выкарыстання „жылая сядзібная зона” і „рэкрэацыйная зона”, а таксама зямель садаводчых таварыстваў і дачных кааператываў. Дадзеная ацэнка землям у 118 адміністрацыйных раёнах, 23.181 сельскім населеным пункце, 202 гарадах і пасёлках гарадскога тыпу, 1.167 сельсаветах і 4.387 садовых таварыствах.
Паводле вынікаў кадастравай ацэнкі на 1 ліпеня 2016 года самыя дарагія зямлі ў краіне — землі Менска. Сярэдні кадастравы кошт зямель сталіцы ў жылой сядзібнай зоне складае 169,36 рубля за 1 кв. м.
Далей тройка гарадоў выглядае наступным чынам: Заслаўе (31,82 рубля за 1 кв. м), Салігорск (30,30), Фаніпаль (30,20).
Сярод абласных цэнтраў самымі дарагімі аказаліся землі Берасця (24,88 рубля за 1 кв. м), самымі таннымі — Магілёва, дзе сярэдні кадастравы кошт зямлі ў жылой сядзібнай зоне склаў 16,52 рубля за 1 кв. м.
Сярод сельскіх населеных пунктаў самыя дарагія землі знаходзяцца ў Менскай вобласці, іх сярэдні кадастравы кошт складае 1,31 рубля за 1 кв. м. Лідарамі па кадастравым кошце сельскіх населеных пунктаў у Менскай вобласці з’яўляюцца Менскі (12,33), Смалявіцкі (3,13) і Дзяржынскі (2,78) раёны.
Самы нізкі кадастравы кошт зямель у сельскіх населеных пунктах — у Магілёўскай вобласці. Напрыклад у Клімавіцкім і Хоцімскім раёнах сярэдні кадастравы кошт зямлі ў сельскіх населеных пунктах склаў 0,12 рубля за 1 кв. м, у Краснапольскім і Круглянскім — 0,14. Такім чынам, сярэдняе значэнне кадастравага кошту зямлі ў Магілёўскай вобласці (0,28 рубля за 1 кв. м) у пяць разоў меншае, чым у Менскай (1,31).
Максімальнае значэнне сярэдняга кадастравага кошту зямель садаводчых таварыстваў і дачных кааператываў таксама ў Менскай вобласці — 2,26 рубля за 1 кв. м. Лідарамі тут з’яўляюцца Менскі раён, дзе сярэдні кадастравы кошт зямель складае 10,85 рубля за 1 кв. м. Высокі кадастравы кошт абумоўлены блізкім размяшчэннем да Менска, наяўнасцю інжынерных камунікацый і добрымі транспартнымі зносінамі, растлумачыла прэс-служба.
Усе матэрыялы пра вынікі кадастравай ацэнкі зямель знаходзяцца ў мясцовых выканаўчых камітэтах на разглядзе і зацвярджэнні. На 7 ліпеня 2017 года ў Нацыянальнае кадастравае агенцтва паступіла 10 рашэнняў аб зацвярджэнні вынікаў кадастравай ацэнкі зямель. Пасля зацвярджэння новыя вынікі будуць выкарыстоўвацца ў тым ліку для мэт падаткаабкладання (з 1 студзеня 2018 года).
