У Глыбокім распачаўся “Вішнёвы фэст”
Пяты па ліку “Вішнёвы фэст” распачаўся ў Глыбокім, што на Віцебшчыне. Цырымонія ўрачыстага адкрыцця прайшла на галоўнай сцэне горада. У ёй прынялі ўдзел творчыя музычныя калектывы і вакалісты Глыбокага, барабаншчыцы ўзорнага ансамбля “Віват”. Падчас мерапрыемства працавалі тэматычныя пляцоўкі грамадскіх аб’яднанняў Глыбоччыны.
Свае ўражанні ад першага дня фэсту і пажаданні надалей выказалі жыхары Глыбокага:
– Мне падабаецца на “Вішнёвым фэсце” тое, што тут усе спяваюць, таньчаць, весяляцца. Я заўсёды буду прыходзіць на гэты фэст.
– Дзецям падабаецца свята, ну і нам прыемна. Вішні квітнеюць, і горад наш квітнее. І фестываль з кожным годам усё больш расквітае. Прыемна, што ў нашым горадзе праводзіцца такое свята.
– Вельмі задаволена. Нашы дзеткі вельмі любяць такія святы. Праходзяць канцэрты, і выступаюць нашыя глыбоцкія таленты.
– Вішнёвы то ён вішнёвы, але ж хочацца, каб жыццё лепшае было! Гэта самае галоўнае. І каб здароўе было. Будзе здароў – будзе ўсё: і святы, і ўсё астатняе.
У гэтым годзе Міністэрства культуры надало фэсту статус міжнароднага. На свята ў Глыбокае прыедуць творчыя калектывы і дэлегацыі з Кітая, Ізраіля, Грузіі, Эстоні, Латвіі, Францыі, Польшчы і іншых краін Еўропы. “Вішнёвы фэст” будзе доўжыцца пяць дзён і скончыцца 22 ліпеня самай цікавай і насычанай праграмай.
[Not a valid template]
Таццяна Смоткіна, Беларускае Радыё Рацыя, Глыбокае
Фота аўтара
Глядзіце таксама
