Смеццевая праблема ў Глыбокім

таму

Выдрукаваць Пракаментаваць (0) Падзяліцца

Смурод, вужакі, пацукі, сабакі, каты, птушкі, якія трыбушаць пакеты, — усё гэта назіраюць жыхары дома 129Б па вуліцы Леніна ў Глыбокім амаль кожны дзень. Побач з домам, у метрах пяцідзесяці, знаходзіцца больш за дзесяць кантэйнераў са смеццем. Па словах жыхароў дома, у гэтае месца звозяць смецце з усяго горада. Смеццявозы не паспяваюць яго адвозіць.

А цяпер жыхары дома 129Б сутыкнуліся яшчэ з новай праблемай – кантэйнеры са смеццем мясцовая жыллёва-камунальная гаспадарка збіраецца перанесці яшчэ бліжэй да іх дома, школы і інтэрната гімназіі.

Па словах жыхароў дома 129Б па вуліцы Леніна ў Глыбокім, ЖКГ ужо пачала работу па ажыццяўленні гэтай задумы.

— Пераносяць смеццевые кантэйнеры проста ў тарэц нашага дома. У доме вялікая колькасць дзяцей, асабліва ў першым пад’ездзе, амаль у кожнай кватэры малыя дзеці. Балконнае ашкленне тут літаральна на тарцы, і ў нас выходзіць каля 20 метраў да гэтага сметніка.

— Мы былі ў санстанцыі перад тым як паехаць у ЖКГ, дык яны не былі праінфармаваныя пра тое, што іх будуць пераносіць.

— Машыны прыязджаюць выкідаць смецце кожны дзень, нават уночы. Выкідаюць дрэвы, што заўгодна. Да ночы сметнікі будуць поўныя, а да раніцы ўвогуле запоўненыя праз верх, нават каля сметнікаў будзе валяцца смецце.

— Развялі клапоўнік. Вунь, каля камбікормавага завода цэлая пляцоўка, дык няхай там паставяць гэтыя кантэйнеры. Усе на машыне возяць смецце сюды. Тут адзін садок, другі садок, школа і сметнік. Прыемна нам, скажыце?

Паводле галоўнага інжынера Глыбоцкай жыллёва-камунальнай гаспадаркі Юрыя Лінкевіча, сметніцы пераносяцца ў тарэц дома №129Б, бо яны стаялі пад вокнамі іншых дамоў.

— Пераносім, выносім іх з вуліцы, каб знешні выгляд быў больш-менш прыстойны. Тое, што яны распавядаюць, не зусім праўда.

РР: Я ведаю, што яны напісалі да вас калектыўны зварот і прапаноўваюць увогуле перанесці сметнікі туды, дзе камбікормавы завод.

— Гэта вельмі далёка. Як будзе дом нумар 129 хадзіць туды? Асабліва старыя людзі, як будуць хадзіць на такую адлегласць, каб вынесці смецце? Гэта не зусім правільна. Людзі думаюць толькі з аднаго боку, з таго, які ім больш карысны.

РР: Але гэтыя сметніцы адназначна будуць менавіта там? Іншыя варыянты не разглядаюцца?

— Больш папросту няма месца.

Па словах жыхароў дома 129Б па вуліцы Леніна ў Глыбокім, кантэйнеры са смеццем гэта не адзіная праблема. Пляцоўка для выгулу сабак знаходзіцца не ў належным стане, дзіцячая таксама. Але пакуль яны будуць змагацца за тое, каб кантэйнеры са смеццем не стаялі побач з домам, школай і гімназіяй.