Аліна Талай заняла 2-е месца на міжнародным турніры ў Польшчы
Беларуская бягуха Аліна Талай заняла другое месца ў бегу на 100 м з бар’ерамі на міжнародным турніры Мемарыял Камілы Скалімоўскай, які адбыўся ў Варшаве.
Спрынтарскую дыстанцыю беларуска прабегла за 12,90 сек. Як паведамлялася, на чэмпіянаце свету, які завяршыўся раней у Лондане, у фінале на 100 м з бар’ерамі яна паказала рэзультат 12,81 сек і размясцілася на шостай пазіцыі.
Пераможцай забегу ў сталіцы Польшчы стала Шарыка Нелвіс з ЗША – 12,65 сек. Бронзавы медаль заваявала Караліна Калечак з Польшчы – 13,26 сек. Прызёр чэмпіянату свету Памэла Дуткевіч з Германіі, якая з’яўлялася адным з фаварытаў, фінішаваць не змагла.
Беларуска Алёна Дубіцкая на гэтым жа турніры ў Варшаве перамагла ў сектары для штурхання ядра. Яе рэзультат – 17,90 см. Тыдзень таму на чэмпіянаце свету яна не змагла пераадолець кваліфікацыйны бар’ер, штурхнуўшы снарад на Алімпійскім стадыёне ў Лондане на 17 м 68 см.
