126 гадоў таму нарадзіўся аўтар гімну „Мы выйдзем шчыльнымі радамі”
18 жніўня 1891 года ў Гарадзенскім павеце нарадзіўся Макар Касцевіч (Краўцоў), аўтар тэкста Ваяцкага маршу, дзеяч Рады БНР.
Нарадзіўся ў заможнай сялянскай сям’і. Скончыў царкоўна-прыходскую школу ў вёсцы Галавачы, Свіслацкую настаўніцкую семінарыю (1910). Працаваў у школе.
З 1915 году — у войску, пасля вайсковай вучэльні — на Паўночна-Заходнім фронце.
Дэлегат Першага Усебеларускага кангрэсу (снежань 1917 года). Настаўнічаў у Менску (1917—1918). Выкладаў на курсах беларусазнаўства пры Менскай гарадской думе (1918).
У 1918 годзе ўступіў у Беларускую партыю сацыялістаў-рэвалюцыянераў
Удзельнік Слуцкага Збройнага Чыну, займаўся ў ходзе яго справамі друку, быў загадчыкам паўстанцкае друкарні ў Клецку.
У міжваенны час жыў у Заходняй Беларусі, працаваў у Радашкавіцкай беларускай гімназіі (1922—1923). Пасля жыў у Вільні, рэдагаваў часапіс «Саха» (1923). Выдаў у Вільні працу па гісторыі БНР «Рада Беларускай Народнай Рэспублікі» (1921).
З 1927 году актыўна ўдзельнічаў у працы Беларускага навуковага таварыства. Друкаваўся (з 1916 году) у пэрыёдыках «Гоман», «Звон», «Беларускае жыццё», «Беларускія ведамасці», «Беларусь», «Наша думка», «Маланка», «Грамадскі Голас», «Беларускае слова» «Сялянская ніва», «Беларуская культура», «Беларускі дзень». Карыстаўся таксама псеўданімам «Язэп Святазар». Арганізоўваў у родных мясцінах беларускія канцэрты, спектаклі.
Арыштоўваўся ўладамі Польшчы.
Сябра Галоўнай управы Таварыства беларускай школы ў 1936—1937 гадах.
Пасля далучэння Заходняй Беларусі да БССР у кастрычніку 1939 году працаваў у рэдакцыі газэты «Віленская праўда». Неўзабаве быў арыштаваны бальшавікамі і закатаваны ў беластоцкай турме.
