„Сонечнае дрэва” для зарадкі мабільных тэлефонаў з’явіцца ў Берасці
Акцыя „Дзень энергіі” упершыню пройдзе ў Берасці 26 жніўня, паведамілі ў гарвыканкаме. Мерапрыемства прадугледжана гарадскім планам дзеянняў па ўстойліваму развіццю энергетыкі ў рамках еўрапейскай ініцыятывы па энергіі і клімаце „Пагадненне мэраў”, да якой горад далучыўся ў 2015 годзе.
Самым інтрыгуючым пунктам у дзень акцыі абяцае стаць адкрыццё так званага „сонечнага дрэва” ў гарадскім парку. Гэта ўстаноўка па зарадцы мабільных тэлефонаў, якая будзе працаваць на сонечных батарэях. Любы жадаючы зможа бясплатна скарыстацца арыгінальнай зарадкай.
„Магутнасць устаноўкі невялікая – гэта дзве сонечныя батарэі агульнай плошчай 3 кв.м. Але энергіі, якую атрымліваюць ад сонца, цалкам дастаткова для падзарадкі мабільных тэлефонаў”, – растлумачыў вядучы інжынер ВКУП „Брэсцкая кацельная гаспадарка” Аляксандр Дзелісевіч. Ён адзначыў, што і „сонечнае дрэва”, і сама акцыя задуманы ў мэтах прасоўвання і папулярызацыі ў горадзе ідэй зялёнай эканомікі.
„Усталяванне з’яўляецца прыкладам альтэрнатыўнай крыніцы энергіі. Мы хочам звярнуць увагу гараджан, суб’ектаў гаспадарання на неабходнасць зніжэння спажывання паліўна-энергетычных рэсурсаў”, – дапоўніў спецыяліст.
У гарадскім парку ў дзень правядзення акцыі разгорнецца выстава-кірмаш з удзелам вытворцаў энергаэфектыўнага абсталявання, выступяць эксперты ў галіне энергаэфектыўнасці і клімату. Праграмай мерапрыемства запланаваны кліматычны квэст, музычная частка, а таксама экскурсіі па прадпрыемствах горада, якія ўкаранілі энергазберагальныя тэхналогіі.
У маршруце значацца Берасцейскі смеццеперапрацоўчы завод, устаноўка па перапрацоўцы драўняных адходаў ВКУП „Камунальнік”, аўтаматызаваная кацельня ВКУП „БКХ”, яслі-сад №51. Арганізатарамі акцыі „Дзень энергіі” выступаюць Берасцейскі гарвыканкам, МГА „Экапартнёрства”, фонд „Інтэракцыя”, БМГА „Час Зямлі”.
Глядзіце таксама
