У Гародні адслужылі акафіст Скарыны
У руінах ніжняй царквы Старога Замка Гародні адслужылі акафіст, складзены Францішкам Скарынам: „Найсалодкага імя Госпада нашага Ісуса Хрыста”. Гэтым гімнам вернікі Праваслаўнай царквы адзначаюць дзень беларускага пісьменства і 500-годдзя выдання Бібліі Францішка Скарыны. Перад пачаткам спеву акафіста настаяцель Свята-Пакроўскага Сабора айцец Георгі Рой сказаў прысутным, што значыць праца Скарыны для вернікаў і Беларусі.
– Слова Божае – жывое. І наш першадрукар выдаваў гэтае слова Божае не для таго, каб яно было проста помнікам, а каб яно жыло. Гэты акафіст быў складзены Францыскам Скарынам. Калі ўважліва чытаеш словы гэтай малітвы, то бачыш, наколькі глыбока набожным чалавекам ён быў.
Падтрымаць спеў акафіста прыйшла харавая група, а таксама вернікі розных прыходаў. Працягне ўрачыстасць Дня беларускага пісьменства імпрэза ў зале праваслаўнага сабора на вуліцы Акадэмічнай. Там а 18-й гадзіне пачнецца прэзентацыя чарговага перакладу на беларускую мову Новага Запавету, а таксама прэзентацыя копіі друкарскага варштату 16 стагоддзя, які зрабілі шчучынскія майстры.
[Not a valid template]
Якуб Сушчынскі, Беларускае Радыё Рацыя, Гародня
Фота аўтара
Глядзіце таксама
