Ідэолаг супраць журналіста – справа ў Глыбокім
Начальнік аддзела ідэалогіі Глыбоцкага райвыканкама Людміла Карніловіч абяцала праблемы з ваенкаматам і пагражала напісаць заяву ў міліцыю на журналіста з Глыбокага Змітра Лупача. Яна забараняла Змітру весці фота-, відэаздымкі рэпетыцыі прысягі рэзервістаў і саму прысягу на цэнтральнай плошчы горада.
Людміла Карніловіч
Матывавала яна гэта тым, што Зміцер Лупач на гэтую падзею не акрэдытаваны:
Людміла Карніловіч: Мерапрыемства закрытае і патрэбная акрэдытацыя, а вы фатаграфавалі. Я бачыла.
Зміцер Лупач: Ну дык што?
Людміла Карніловіч: Калі вашы фотаздымкі з’явяцца там, дзе з’явяцца, я буду вымушана напісаць заяву.
Зміцер Лупач: Дык зрабіце за плотам тады, ці ў самой частцы.
Людміла Карніловіч: Мы за плотам не робім. Але мы сёння папярэджваем сродкі масавай інфармацыі, што працуюць акрэдытаваныя СМІ. Вы ў нас не акрэдытаваныя рабіць фотарэпартажы, відэа і аўдыё з гэтага мерапрыемства. Я вас папярэджваю. Папярэджваю пры людзях, якія таксама нясуць адказнасць за бяспеку на гэтым мерапрыемстве.
Па словах Змітра Лупача, пагрозы ў свой адрас ён чуе не ўпершыню. Яму калісьці пагражаў кіраўнік сельгаспрадпрыемства “Канстанцінаў двор” Юры Вахавіч. Дарэчы, яго нядаўна звольнілі з гэтай пасады. Людміла Карніловіч ужо не першы раз забараняе яму весці фота-, відэаздымку. Некалькі разоў яна рабіла такія заўвагі падчас каталіцкага фестывалю “Магніфікат”, які ўжо не праводзіцца ў Глыбокім.
— Пагражала, можа яшчэ ў суд і выклічуць. Я ў прынцыпе да гэтага гатовы. У яе гэта ўжо другі заход. Яе першы раз былі не зацвердзілі начальніцай некалькі гадоў таму, а цяпер зацвердзілі. Гэта проста яна вырашыла паказаць, што яна тут вельмі значная фігура, бо я здымаў цягам больш як гадзіны і там былі і ваенныя, і міліцыянты, і прадстаўнікі улады, але ніхто да мяне не падышоў і нікому я там не перашкаджаў. Толькі чамусьці Людміле Фёдараўне перашкаджаў.
„Абсурд ўлады мацнее! Заўтра яны пачнуць прасіць акрэдытацыю на здымкі, напрыклад, ранішніка ў дзіцячым садку! А калі сур’ёзна, то для здымкаў у грамадскім месцы дазволу ні ў каго пытаць не трэба. На парадах у Мtнску не забараняюць фатаграфаваць ні ваенную тэхніку, ні галоўнакамандуючага!” — гаворыць праваабаронцаь Павел Левінаў.
Таццяна Смоткіна, Беларускае Радыё Рацыя
