Каталіцкія біскупы з краін Еўропы правядуць службы ў менскіх храмах
Кіраўнікі епіскапскіх канферэнцый з 45 краін свету прыбудуць у Менск для ўдзелу ў пленарным пасяджэнні Савета канферэнцый каталіцкіх біскупаў Еўропы. У ходзе асамблеі некаторыя іерархі наведаюць прыходы Менска, дзе прымуць удзел у службах, паведамілі ў Рымска-каталіцкай царкве ў Беларусі.
Так, 28 верасня ў 19.00 адбудзецца служба ў храме святога Сымона і святой Алены (Чырвоным касцёле). Яе правядзе прэфект Кангрэгацыі па справах біскупаў кардынал Марк Уэле.
На 29 верасня ў 18.30 намечана імша ў касцёле імя Найсвяцейшай Панны Марыі (архікафедральным саборы), якую правядзе Мітрапаліт Мінска-Магілёўскі архібіскуп Тадэвуш Кандрусевіч.
Служба ў храме Найсвяцейшай Тройцы (святога Роха) на Залатой Горцы адбудзецца 30 верасня ў 19.00, яе правядзе кардынал Анджэла Баньяска, архібіскуп Генуі, кіраўнік Савета епіскапскіх канферэнцый Еўропы.
Плануецца, што і 1 кастрычніка іерархі наведаюць некаторыя прыходы Менска, дзе ўзначаляць імшу і сустрэнуцца з вернікамі. Расклад на 1 кастрычніка з’явіцца пазней.
Пленарнае пасяджэнне Савета канферэнцый каталіцкіх біскупаў Еўропы будзе праходзіць у Менску з 28 верасня па 1 кастрычніка, яно прысвечана моладзі і будучыні кантынента як агульнага дому. Рашэнне аб гэтым было прынята ў ходзе мінулагодняга такога форуму кіраўнікоў каталіцкіх епіскапатаў Еўропы, які праходзіў у Манака.
Падагульняючы дакумент пленарнага пасяджэння ў Менску будзе агучаны 30 верасня.
Савет канферэнцый каталіцкіх біскупаў Еўропы бярэ свой пачатак у 1965 годзе, калі ў час сустрэчы 13 кіраўнікоў нацыянальных епіскапатаў у Рыме быў заснаваны камітэт, накіраваны на развіццё магчымасцей для больш цеснага супрацоўніцтва на ўзроўні мясцовых епіскапатаў. Устаноўчы сход Савета адбыўся ў Рыме 23-24 сакавіка 1971 года. У яго склад уваходзяць 39 членаў – Канферэнцыі біскупаў еўрапейскіх краін і некалькі іншых іерархічных структур. У час штогадовай пленарнай асамблеі праходзяць выбары месца наступнага пленарнага пасяджэння.
