1. РАЦЫЯ
2. Культура
3. Навошта польскі амбасадар хоча пасварыць беларусаў і палякаў?

Навошта польскі амбасадар хоча пасварыць беларусаў і палякаў?

21-га кастрычніка адбудзецца адкрыццё першага ў свеце помніка Тадэвушу Касцюшку пастаўленага беларусамі.

Як і планавалася, на шыльдзе павінна была быць адлюстравана інфармацыя пра яго прыналежнасць да Беларусі.

На жаль, намаганнямі польскага амбасадара ў Берне, змест шыльды быў моцна зменены. З помніка прыбралі не толькі радкі „Сыну Беларусі ад удзячных суайчыннікаў”, але і беларускамоўную версію надпісу.

Кажа намеснік старшыні Асацыяцыі беларусаў Швейцарыі Алесь Сапега:

РР: Дзе гэты помнік увогуле будзе?

– Як і планавалася адкрыццё прысвечана 200-годдзю са дня смерці Касцюшкі і пройдзе ў горадзе Залатурн, дзе ён калісьці жыў і памёр.

РР: Хто яго рабіў?

– Рабіў яго ва Украіне мастак Уладзімір Райчык. Мы з ім дамаўляліся яшчэ два гады таму і напрацягу гэтага часу разам з ім працавалі. 6-га кастырчніка я прывёз гэты помнік у Залатурн, дзе яго і перадаў. Сам помнік з бронзы, 1 метр 80 сантыметраў вышынёў, і выглядае як сапраўдны Касцюшка.

РР: Надпіс „Сыну Беларусі ад удзячных суайчыннікаў” меўся там быць. На якім этапе ён знік? Хто ўвогуле прымаў рашэнне, што там гэты надпіс будзе?

– Інфармацыя на шыльдзе не паўстала проста так, мы звярнуліся да эксперта. Уладзімір Арлоў, якога ўсе ведаюць, параіў нам напісаць на шыльдзе, што мы і прадставілі мэру горада. На жаль пад уплывам польскай амбасады мэр быў вымушаны прыбраць словы „Сыну Беларусі ад удзячных суайчыннікаў”. Цяпер гэта толькі нямецкая версія, але раней планавался, што будзе і па-беларуску. У цяперашнім варыянце няма ніякай прывязкі да Беларусі. Мы гэта проста так не пакінем.

РР: Што будзе напісана па-нямецку?

– Там будзе імя Тадэвуш Касцюшка ў польскай транслітэрацыі, год нараджэння, год смерці і ўнізе маленькі надпіс „Аб’яднанне беларусаў у Швейцарыі”.

РР: Чым прадстаўнікі польскай амбасады матывуюць свае дзеянні?

– Я асабіста два разы сустракаўся з польскім амбасадарам і ўжо падчас нашай размовы было зразумела, што польскі бок не бачыць кампрамісу ў дачыненні да польскага нацыянальнага героя Касцюшкі. На падставе гэтага мы былі вымушаныя адмовіцца супрацоўнічаць з палякамі, бо тыя патрабаванні, якія прадстаўляла польская амбасада, ніяк не пасавалі беларускай дыяспары, якая ад пачатку да канца два гады займалася помнікам. Мы знайшлі грошы, арганізавалі мерапрыества. Мы запрашалі палякаў, як ганаровых гасцей, але яны нават не далі адказу. Сітуацыя складаная, але спадзяюся ўсё вырашыцца.

Гутарыў Улад Грынеўскі, поўную гутарку слухайце ў далучаным файле:

Польскі амбасадар прыгразіў, што афіцыйная дэлегацыя з Кракава і Варшавы, як і ён сам, адмовяцца ад удзелу ў швейцарска-польскім святкаванні, якое пройдзе 15-га кастрычніка ў Залатурне. Мэр горада змяніў шыльду на тую версію, якая задаволіла полякаў.