Школа маладога пісьменніка рыхтуецца да прэзентацыі
Школа маладога пісьменніка, якая працуе пры Саюзе беларускіх пісьменнікаў, рыхтуецца да сваёй прэзентацыі. Яна адбудзецца падчас Стральцоўскага фестывалю паэзіі, які пройдзе ў сярэдзіне лютага.
Кажа куратар школы Алена Казлова:
– Неўзабаве ў сярэдзіне лютага будзе Фестываль імя Міхася Стральцова, гэта паэтычны фестываль, але ў межах яго будзе прэзентацыя Школы маладога пісьменніка, у ёй прымуць удзел нашыя вучні і многія з іх першы раз прадставяць аўдыторыі свае творы.
Школа маладога пісьменніка дзейнічае з 2012 года.
Навучанне доўжыцца адзін год. Гэта нефармальны адукацыйны праект, сертыфікат аб яе заканчэнні не замяняе дыплома афіцыйных навучальных устаноў.
* * *
Саюз беларускіх пісьменнікаў cкончыў прыём заявак ад ахвотных навучацца ў Школе маладога пісьменніка, якую ён заснаваў тры гады таму.
Заняткі будуць праходзіць у Менску з пачатку лістапада – па травень. «Магчыма ў працы школы будуць нейкія змены,» – кажа каардынатарка Школы Алена Казлова:
– У гэтым годзе можа змяніцца расклад, можа быць мы будзем займацца толькі па суботах. Можа быць, будзе больш майстар-класаў. Усё залежыць ад таго, як мы здолеем з памяшканнем дамовіцца і гэтак далей. У нас не так шмат магчымасцяў, і мы ўсё вырашаем па ходзе справы.
Школа маладога літаратара пры Саюзе беларускіх пісьменьнікаў – першы падобны досвед. Раней спробы абмяжоўваліся навучальнымі семінарамі, якія трывалі некалькі дзён.
Хто сёлета стане навучэнцам Школы малалога літаратара – Саюз беларускіх пісьменнікаў абвесціць пасля пятага лістапада.
Васіль Кроква, Беларускае Радыё Рацыя
Глядзіце таксама
