Паэту, барду Сержуку Сокалаву-Воюшу – 60 год
Сержука Сокалава-Воюша без перабольшвання можна назваць галоўным бардам нацыянальнага абуджэння ў Беларусі другой паловы 80-х гадоў. Яго песні гучалі і на мітынгах, і на канцэртах (нават у філармоніі), і на літаратурных імпрэзах і пры вогнішчы ў вандроўках.
Са сваёй гітарай Сяржук паспяваў быць усюды. Усе яго песні былі пра Беларусь. Ад лірычных, да патрыятычных і ваярскіх.
Удзельнічаў Сяржук і ў першых фестывалях Музыкі Маладой Беларусі «Басовішча» ў падляшскім Гарадку. І добра запомніўся беларусам Падляшша.
Гэта быў той час, калі вершы чыталіся на мітынгах, калі спевы пад гітару запісваліся на бабінныя магнітафоны, калі паэзія была агменем, які грэе, і паходняй, якая асвятляе шлях.
Сяржук Сокалаў-Воюш быў гарністам таго часу.
Яго паэзія сапраўды знаходзіла водгук. Без яе, відаць, нацыянальная адліга канца 80-х не была б такая спеўная, паэтычная, задзірыстая.
Беларускае Радыё Рацыя віншуе юбіляра і жадае яму новых кніг, новых вершаў, новых цудоўных песень.
Жыве Беларусь!
Алесь Аркуш, Беларускае Радыё Рацыя
