За аптымізм!
Восень. Пара падводзіць вынікі. Белстат не парадаваў: упершыню за сем месяцаў у Беларусі знізіўся сярэдні заробак… Такі знізіўся. Нечакана. На цэлых 13 рублёў 10 капеек.
Сярэднестатыстычны беларус не мог не расстроіцца, і толькі сярэднестатыстычны пенсіянер можа спаць спакойна. І нават парадавацца.
17 кастрычніка кіраўнік дзяржавы падпісаў указ №377 „Аб падвышэнні пенсій”. Дакумент прадугледжвае правядзенне з 1 лістапада 2017 года пераразліку працоўных пенсій у сувязі з ростам сярэдняй заработнай платы ў рэспубліцы. Што маем? Працоўныя пенсіі павінны вырасці на 5% з лістапада месяца, хоць заробкі працоўных зменшыліся насуперак указу. Указы дрэнна спалучаюцца з эканамічнымі механізмамі, але спалучыць іх спрабуюць з нязгасным энтузіязмам. Без каманды войска гіне… Пэўна, з эканомікай тая ж гісторыя. У нашых шэрых шыротах.
Прасцей жыць не думаючы пра ўзрост. І тут будуць вельмі дарэчы парады акадэміка Наталлі Бехцеравай. Эмоцыі важней за ўсё! Станоўчыя, пазітыўныя эмоцыі. Думайце пра добрае, спадарства, утрымлівайце душэўны баланс – і будзе вам шчасце. Не менш важная рэч – змена відаў дзейнасці: сёння вышываем крыжыкам, а заўтра варым боршч. Яшчэ маем кнігі і музыку… Галоўнае, каб вашай пенсіі ці заробку хапіла на пазітыўны мінімум. Лічыце самі, шаноўныя!
Рашэнне гэтай задачы вымагае шмат высілкаў, затое трэніруе працу шэрых мазгавых клетачак, што таксама плюс. Жыццё цудоўнае!