У беларускай арміі „шукаюць” нестатутныя адносіны
З мэтай прафілактыкі парушэнняў статутных правілаў узаемаадносін, забеспячэння бяспекі ваеннай службы Міністэрствам абароны сумесна з органамі правапарадку, Камітэтам салдацкіх маці з 16 кастрычніка 2017 года рэалізуецца комплекс дадатковых мерапрыемстваў па вывучэнні ўнутрыкалектыўных адносін сярод ваеннаслужачых, праверцы паўнаты і якасці выканання службовымі асобамі патрабаванняў кіруючых дакументаў па папярэджанні правапарушэнняў, паведамляе прэс-служба Міністэрства абароны Беларусі.
У інфармацыі не ўказваецца, што паслужыла падставай для праверкі, але на фоне апошніх падзей, звязаных з гібеллю ў навучальным цэнтры ў Печах, хутчэй за ўсё, яна выклікана менавіта гэтымі падзеямі.
„Асноўны ўпор зроблены на працы ў тых злучэннях і воінскіх часцях, дзе раней ўзбуджаліся крымінальныя справы па фактах парушэння статутных правілаў узаемаадносін, а таксама мелі месца парушэнні ў забеспячэнні патрабаванняў бяспекі ваеннай службы”, — гаворыцца ў паведамленні МА.
Ваеннае ведамства, як заяўляюць аўтары тэксту, „пацвярджае пазіцыю і надалей строга кіравацца патрабаваннямі загада міністра абароны Рэспублікі Беларусь № 1 ад студзеня 2015 года аб прыняцці самых жорсткіх мер да службовых асоб, якія дапускаюць ўтойванне правапарушэнняў і непрыняцце па іх неабходных мер рэагавання, а таксама аб падтрымцы камандзіраў і начальнікаў, якія выкрываюць негатыўныя з’явы і іх прычыны і прымаюць своечасовыя неабходныя меры па падтрыманні законнасці і правапарадку да наступлення негатыўных наступстваў”.
21-гадовага радавога Коржыча знайшлі павешаным са звязанымі нагамі і апранутай на галаве майкай 3 кастрычніка ў падвале медроты. 5 кастрычніка ў якасці першапачатковай версіі следства назвала суіцыд, але сваякі з гэтым не пагадзіліся і заявілі аб гвалтоўным характары смерці. У выніку Следчы камітэт распачаў справу па ч. 3 арт. 443 КК (парушэнне статутных правілаў узаемаадносін паміж асобамі, на якіх распаўсюджваецца статус ваеннаслужачага, пры адсутнасці адносін падпарадкаванасці, якое пацягнула цяжкія наступствы). Камітэт разглядае тры версіі трагедыі: давядзенне да самагубства, забойства і самагубства.
Па справе Коржыча заключана пад варту 10 чалавек, узбуджана 13 крымінальных спраў, аб’яднаных у адной вытворчасці. 20 кастрычніка прэзідэнт адхіліў ад пасады начальніка 72-га гвардзейскага Аб’яднанага навучальнага цэнтра падрыхтоўкі прапаршчыкаў і малодшых спецыялістаў Узброеных сіл палкоўніка Канстанціна Чарнецкага.
belapan.by
