Беларускія недзяржаўныя выдавецтвы прыехалі на кірмаш у Варшаву
Больш за сто выдавецтваў і фундацыяў прэзентуюць сябе ў каралеўскім замку, сярод іх таксама і беларусы. Беларускі Дом у Варшаве арганізаваў свой стэнд на 26-ым Кірмашы гістарычнае кнігі.
Сярод прывезеных выданняў – “Ліцвіны ў Гвардыі Напалеона”, забароненыя для прэзентацыі ў Беларусі творы СБМаўца Вікенція Мароза, а таксама шэраг публікацыяў, прысвечаных вялікаму юбілею 500-годдзя друкавання Бібліі Францішкам Скарынам.
Гаворыць сустаршыня Беларускага Дома ў Варшаве Уладзімір Кобец:
– Беларускі дом, як асяродак беларускага жыцця ў Варшаве, як цэнтр культурнага беларускага жыцця, у гэтым годзе вырашыў арганізаваць беларускі ўдзел у Кірмашы гістарычнае кнігі – падарыць беларусам Варшавы кніжкі недзяржаўных беларускіх выдавецтваў. У нас вы можаце знайсці кніжкі 6 выдавецтваў – гэта “Кнігазбор”, Arche, “Лімарыус”, “Тэхналогія”, Янушкевіч і “Галіяфы”.
Практычна ўсе выданні на стэндзе – беларускамоўныя. Тым ні менш, гэта не адпужвае польскіх чытачоў, гаворыць Ксенія Тарасевіч з выдавецтва “Тэхналогія”:
– Прайшло літаральна дзве гадзіны, і ўжо ўзялі “Ліцвінаў”, кнігу пра Караля Касцюшку-Валюжыніча. То бок іх абсалютна не пужае беларуская мова. Яны наадварот цягнуцца, наадварот цікавяцца, пытаюцца.
Кірмаш гістарычнае кнігі будзе трываць у Варшаве да нядзелі ўключна. Выставачныя павільёны месцяцца ў дольнай частцы каралеўскага замку, у Аркадах Кубіцкага.
Цалкам матэрыял у гукавым фармаце:
Адам Завальня, Беларуская Радыё Рацыя
Фота аўтара
Глядзіце таксама
