У Маскве адбылося лёсаванне чэмпіянату свету па футболе
У маскоўскім Крамлі адбылося лёсаванне фінальнай стадыі чэмпіянату свету па футболе, які пройдзе ў 2018 годзе на палях 11 гарадоў Расейскай федэрацыі.
Задоўга да жараб’ёўкі 32 дружыны-фіналісты былі размеркаваныя на 4 поты. Пры тым Расея як гаспадар першынства трапіла ў актэт так званых „матак” – мацнейшых па рэйтынгу ФІФА. Далей зборныя размяркоўваліся па кошыках таксама ў адпаведнасці з сваім рэйтынгам.
Вось гэтыя васьмёркі пры сеянні:
Расея, Германія, Бразілія, Партугалія, Аргенціна, Бельгія, Польшча, Францыя;
Іспанія, Перу, Швайцарыя, Англія, Калумбія, Мексіка, Уругвай, Харватыя;
Данія, Ісляндыя, Коста-Рыка, Швецыя, Туніс, Егіпет, Сенегал, Іран;
Сербія, Нігерыя, Аўстралія, Японія, Марока, Панама, Карэя, Савудаўская Арабія.
Пры тым сістэма лёсавання была такой, каб каманды з аднога кантыненту не маглі трапіць разам у адну групу. За выняткам, зразумела, Еўропы, прадстаўніцтва якой на форуме такое, што гэтага ўнікнуць было проста немагчыма.
На ўрачыстай цырымоніі прысутнічалі многія трэнеры нацыянальных дружын, а таксама славутыя футбалісты мінулага.
На сцэну былі выкліканыя такія знакамітыя ў мінулым гульцы як Гордан Бэнкс, Мікіта Сіманян, Дыега Фарлан, Дыега Марадона, Ларан Блан, Кафу, Карлес Пуёль, Фабіё Канавара, Гары Лінекер, якія былі задзейнічаны ў жараб’ёўцы.
Поўныя вынікі лёсавання такія:
Група „А”: Расея, Савудаўская Арабія, Егіпет, Уругвай;
Група „В”: Партугалія, Іспанія, Марока, Іран;
Група „С”: Францыя, Аўстралія, Перу, Данія;
Група „D” : Аргенціна, Ісляндыя, Харватыя, Нігерыя;
Група „Е”: Бразілія, Швайцарыя, Коста-Рыка, Сербія;
Група „F”: Германія, Мексіка, Швецыя, Паўднёвая Карэя;
Група „G”: Бельгія, Панама, Туніс, Англія;
Група „H”: Польшча, Сенегал, Калумбія, Японія.
Чэмпіянат свету пройдзе з 14 чэрвеня па 15 ліпеня 2018 года.
Беларускае Радыё Рацыя
