У „Бярозаўскім” поле зааралі разам з кукурузай
5 гектараў кукурузы з пачаткамі на полі сельгаспрадпрыемства “Бярозаўскае” закультывавана. Такі спосаб уборкі ўраджаю вынайшла кіраўніцтва гаспадаркі ў сувязі з неспрыяльным надвор’ем.
Анатоль Сахаруша – аграном па адукацыі, які ўсё жыццё прапрацаваў у сельскай гаспадарцы, лічыць гэта безгаспадарчасцю:
– Дзесьці да 15-20 верасня яна мусіць быць сабраная на сілас. На насенне – да 15 кастрычніка. Спасылаюцца зараз на тое, што трактары не могуць выйсці на поле. А дзе вы пасадзілі кукурузу? На балоце. Калі кукурузу садзіць на адпаведным полі, сабярэш яе пры любым надвор’і.
Паводле намесніка начальніка аддзела па раслінаводству і кормавытворчасці Берасцейскага аблвыканкама Віталя Рудзя, заворваць у зямлю кукурузу з пачаткамі нельга, але трэба пралічваць усе канкрэтныя абставіны:
– Калі зараз тэхніку рваць, то толькі салярку спаляць і тэхніку сапсуюць. Выйдзе ў дзесяць разоў даражэй. А яшчэ трэба высушыць кукурузу. Тут трэба падлічыць. Задыскоўваць з пачаткамі нельга.
Па словах Анатоля Сахарушы, гэта не адзінае поле на Бярозаўшчыне і наогул на Берасцейшчыне з несабраным ураджаем.
Хаця Аляксандр Лукашэнка загадаў завяршыць уборку да 7 лістапада. Толькі на кукурузу адвёў крыху большы тэрмін. Але ж на вуліцы ўжо снежань.
Беларускае Радыё Рацыя
