7 лістапада: жахі таталітарызму, настальгія па мінулым ці нагода выпіць?
7 лістапада ў Беларусі адзначаюць Дзень Кастрычніцкай рэвалюцыі. З краін былога СССР святкуюць яго толькі ў Беларусі і Кыргызстане. Але святкаваць яго не толькі ганебна, але і амаральна, кажа гісторык Павел Дайлід:
– Бальшавіцкая ўлада, якая прыйшла ў Беларусь з Расеі ў выніку перавароту, прынесла нашаму народу толькі смерць, сібірскія лагеры, прымусовую калектывізацыю, культурны генацыд і жахі таталітарызму. Чаму нашыя ўлады працягваюць святкаваць гэты дзень? З атрыманнем незалежнасці ў Беларусі не была праведзеная дэсаветызацыя ўлады. Бо яна мусіла б уключаць люстрацыю.
У розных узроставых катэгорый свае адносіны да свята: хто настальгуе па тых часах, каму выходны, а каму – нагода выпіць. Мінакі:
– Не было б кастрычніцкай рэвалюцыі – не было б і Беларусі! Як людзі жылі да рэвалюцыі? Людзі ў лапцях хадзілі, безграматнымі былі. Вось і святкуем, таму што ўсе сталі граматнымі.
– Ужо ніхто і не памятае, а моладзі і растлумачыць немагчыма, што за свята такое.
– Добра, што выходны.
– Тых, хто паў за рэвалюцыю, памянём!
Былі добрыя прапановы: перанесці гэтае свята на Дзяды 2 лістапада, каб на дзяржаўным роўні адзначаць Дзень ушанавання продкаў.
Беларускае Радыё Рацыя
Фота abzac.ru
Цалкам матэрыял слухайце ў далучаным гукавым файле.
Глядзіце таксама
