Беларуска-расейская мяжа: Лукашэнка адыходзіць у бок
Зніжэнне празрыстасці беларуска-расейскай мяжы з’яўляецца раздражняльнікам для вышэйшага палітычнага кіраўніцтва Беларусі. Дзеянні расейскага боку ў памежнай сферы за апошнія два гады сведчаць пра хутчэй кепскія перспектывы двухбаковых адносін. Асабліва насцярожвае Менск той факт, што расейскі бок матывуе свае аднабаковыя дзеянні меркаваннямі бяспекі, намякаючы намагчымую пагрозу для Расеі з тэрыторыі Беларусі.
11.01.2018 Аляксандр Лукашэнка даручыў на працягу гэтага года вырашыць усе пытанні з Расеяй у пагранічнай сферы. Што, мяркуючы па яго словах павінна прывесці да аднаўлення раней існаваўшага ўзроўню празрыстасці беларуска-расейскай мяжы. Пры гэтым А. Лукашэнка ўсклаў адказнасць за ўрэгуляванне сітуацыі на Урад і галіновыя міністэрствы. Беларускім чыноўнікам даручана абмеркаваць усе існуючыя рознагалоссі з расейскім бокам і вызначыцца са шляхамі іх вырашэння. Сам жа беларускі лідар ад удзелу ў урэгуляванні праблемнай сітуацыі фактычна самаўхіліўся.
Цікава адзначыць: А. Лукашэнка заявіў, што ў цяперашні час на беларуска-расейскай мяжы расейскімі памежнікамі праводзіцца суцэльная праверка пашпартоў пры ўездзе ў Расею. На самай справе, гэта не зусім так: беларусам дастаткова толькі прад’явіць расейскім памежнікам пашпарт. Даты ўезду і выезду ніхто не фіксуе. Гэта значыць праверка пакуль носіць досыць павярхоўны характар. Як мне распавядалі мясцовыя жыхары, расейскія памежнікі пускаюць беларусаў на сваю тэрыторыю і па ксеракопіі пашпарта. Але словы А. Лукашэнкі могуць апынуцца не памылкай, а агаворкай: беларускім уладам магчыма вядомыя далейшыя планы расейскага боку адносна ўзмацнення кантролю на мяжы. І тады пашпарты сапраўды будуць правяраць як след і ва ўсіх.
Варта нагадаць, што на працягу мінулага года сітуацыя вакол беларуска-расейскай мяжы не раз была ў поле зроку А. Лукашэнка. Ён выказваў СМІ незадавальненне дзеяннямі расейскага боку па разгортванні сістэмы памежнай аховы. У ліпені пытанне аб сітуацыі на мяжы Беларусі і Расеі разглядалася на нарадзе А. Лукашэнкі з кіраўніцтвам Савета бяспекі Беларусі.
А. Лукашэнка традыцыйна пазбягае асабістага удзелу ў тых пытаннях, дзе пазітыўныя рашэнні не праглядаюцца. Відавочна, што зніжэнне празрыстасці мяжы Беларусі з Расеяй – гэта менавіта такая, невырашальная, праблема. Дзеянні Масквы з’яўляюцца эпізодам шырокіх беларуска-расейскіх супярэчнасцей. Сітуацыя на мяжы можа быць урэгулявана толькі ў рамках агульнай нармалізацыі адносін паміж Беларуссю і Расеяй. З улікам арганізацыйных намаганняў і матэрыяльных затрат, зробленых расейскім бокам для разгортвання памежнай аховы з Беларуссю, змякчэнне расейскай пазіцыі магчымае толькі пасля істотных саступак беларускага боку. Самаўхіленне А. Лукашэнкі ад вырашэння сітуацыі – ускосная прыкмета непрымальнасці для яго расейскіх патрабаванняў. А значыць, беларуска-расейская мяжа і далей будзе набываць рысы паўнавартаснай міждзяржаўнай граніцы, уключаючы розныя механізмы кантролю на ёй.