Дзяржаўныя сельскія гаспадаркі ў Беларусі застаюцца калгасамі
У Беларусі 16 лістапада ў чарговы раз будуць адзначаць Дзень работніка сельскай гаспадаркі. Аляксандр Лукашэнка ганарыцца, што захаваў у рэспубліцы калгасы. За 20 гадоў незалежнасці мяняліся назвы, мяняліся формы, а сутнасць калгаснай сістэмы з савецкіх часоў засталася тая ж неэфектыўная, кажа Анатоль Сахаруша, які прапрацаваў 40 гадоў у калгасах на розных пасадах:
– Рэнтабельнай нашая сельская гаспадарка не была ніколі. Па-першае, нашая сельская гаспадарка не забяспечвае сябе хлебам, таму што ў нас не вырошчваюцца цвёрдыя сарты зерневых. У нас вялікія запазычанасці. Прычына нерэнтабельнасці нашай сельскай гаспадаркі ў тым, што яна дагэтуль застаецца нерэфармаванай.
Працаўнікі сельскай гаспадаркі згодны з Сахарушай і адзначаюць недахопы калгаснай сістэмы:
– У калгасе – гэта чужое. А сваё – ёсць сваё, ты за ўсё хварэеш і стараешся, каб у цябе было.
– У 90-м годзе прыйшоў з арміі, у нас было 82 чалавекі ў будаўнічай брыгадзе. Зараз – 12. Фермер думае наперад. У нас жа адзін дырэктар, а падначаленых шмат. І кожны адзін на аднаго спіхвае, грабуць толькі пад сябе, пра калгаснікаў зусім не думаюць.
Па словах былога старшыні калгаса Вячаслава Сухарэбскага, стратных калгасаў у дзяржаве больш 90 %, але яны былі і ёсць апорай таталітарным сістэмам як Савецкага Саюза, так і яго спадкаемцы Беларусі.
Беларускае Радыё Рацыя
Фота westki.info
Глядзіце таксама
