Валянцін Стэфановіч: Адзіночныя пікеты павінны праводзіцца ўвогуле без апавяшчэння
Змена прынцыпу правядзення пікетаў з заяўнага на апавяшчальны не мае вялікага сэнсу, паколькі месцы, вылучаныя для пікетаў і мітынгаў мясцовымі ўладамі па ўсёй Беларусі знаходзяцца далёка ад цэнтральных частак гарадоў і адміністратыўных будынкаў.
Прадстаўнік праваабарончага цэнтру «Вясна» Валянцін Стэфановіч лічыць, што адзіночныя пікеты павінны наогул абыходзіцца без апавяшчэння:
– Можаце на выбар узяць рашэнне райвыканкама любога раёна Беларусі, вы ўбачыце, што ў цэнтры гарадоў забаронена праводзіць масавыя мерапрыемствы, акрамя тых, якія праводзіць дзяржава. А можна толькі ў нейкіх аддаленых ад центра, або ў месцах, якія ўвогуле не наведваюць грамадзяне. Таму правядзенне там па заяўляльным прынцыпе, яно нічога не мяняе, таму што невелюе саму сутнасць свабоды мірных сходаў і выказванне свайго меркавання. Пікетаваць, напрыклад, міністэрства абароны ў кустах – гэта вельмі дзіўна. Да таго ж за гэта трэба будзе заплаціць грошы.
Беларускія праваабаронцы падрыхтуюць сваю справаздачу па стане правоў чалавека ў дзяржаве. А на гэтым этапе важна, што ўдалося данесці да ўладаў крытыку некаторых пунктаў закону, якія парушаюць канстытуцыйныя правы і свабоды беларусаў, – зазначыў Валянцін Стэфановіч.
Кастусь Багушэвіч, Беларускае Радыё Рацыя
