Каталіцкія біскупы Беларусі заклікалі маліцца 25 сакавіка за краіну і народ
У касцёлах Беларусі ў Пальмавую нядзелю, што сёлета прыпадае на 25 сакавіка, будуць маліцца за Беларусь і беларускі народ у сувязі з 100-й гадавінай абвяшчэння незалежнасці Беларускай Народнай Рэспублікі, перадае «Радыё Ватыкан».
«Утварэнне Беларускай Народнай Рэспублікі — першы крок да сённяшняй незалежнасці, — тлумачыць афіцыйны прадстаўнік Канфэрэнцыі каталіцкіх біскупаў у Беларусі Юры Санько. — Касцёл не можа застацца ў баку, нягледзячы на тое, што 25 сакавіка сёлета будзе вельмі важным днём у Вялікім посце — гэта Пальмавая нядзеля. Касцёл сваёй малітваю, сваёй прысутнасцю асвячае нашую зямлю, таму біскупамі было прынятае рашэнне аб стварэнні адмысловай малітвы, якой святары ў гэты дзень будуць прасіць Бога за нашу Бацькаўшчыну, наш народ, каб добры Бог дабраслаўляў і напаўняў нашую штодзённасць сваёй прысутнасцю».
Ці будзе малітва асобнай па завяршэнні эўхарыстыі, ці будзе адным з заклікаў да вернікаў, пакуль не вырашана. У некаторых парафіях запланаваная асобная імша за Беларусь. Паводле Санько, кожны святар, верагодна, будзе сам прымаць рашэнні па сваёй парафіі.
Глядзіце таксама
