У Баранавічах 25 сакавіка свята пачнецца а 12-й гадзіне ў Маладым парку
У Баранавічах святкаванне 100-годдзя БНР пачнецца 25 сакавіка а 12-й гадзіне ў Маладым парку ў цэнтры гораду. Такое рашэнне са спазненнем прыняў мясцовы выканкам, які адмежаваўся ад вулічнага святкавання. Аплата за адпаведныя службы пакладзена на плечы арганізатараў – дэмакратычную супольнасць, незважаючы на іх просьбу аплаціць з бюджэта паслугі камунальнікаў, медыкаў і міліцыі.
Кажа сябра руху “За свабоду” Юрый Казакевіч:
– Трэба сказаць, што ўсе гэтыя арганізацыі выставілі нам мінімальныя рахункі, згодна заканадаўству, згодна іх расцэнак. Калі мы гэта ўсё склалі, то вырашылі, што проста абавязаны напружыцца з усіх сіл, каб і грошы знайсці, і ўхітрыцца за тыя дні, што засталіся, арганізаваць насычаную, вартую культурную праграму.
Па словах Юрыя Казакевіча, грошы выдзяляюць спонсары. Праграма ўключае выступ гісторыка Ігара Мельнікава, выступы музычных гуртоў, віктарыны і ярмарку рамеснікаў.
Калі першая палова святкавання адбудзецца ў Маладым парку, то другая – ў школе мастацтваў, дырэктарка якой падтрымала свята, як і кіраўніцтва музычнай вучэльні, што знаходзіцца побач.
Праграма свята абяцае быць разнастайнай і цікавай, кажа старшыня мясцовага Таварыства беларускай мовы Мікалай Падгайскі:
– У нас музычных нумароў хапае і не толькі ад музычнай школы. Яшчэ “Фэст” павінен выступаць, ёсць у нас такі добры музычны ансамбль. І ёсць прапановы з Менску. Дамовіліся, што Анатоль Сідарэвіч будзе выступаць у якасці гісторыка пра БНР у самым пачатку. Ужо пунктаў 20 гэтай праграмы.
Паводле Мікалая Падгайскага, у школе мастацтваў свята пачынаецца а 15-й гадзіне. Да падрыхтоўкі свята спрычыніліся ўсе дэмакратычныя сілы.
Арганізатары спадзяюцца, што будзе цікава ўсім, ад малога да дарослага.
Беларускае Радыё Рацыя
