Сусветны банк накіруе на фінансаванне праектаў у Беларусі каля $570 млн
Сусветны банк у 2018-2022 гадах накіруе на фінансаванне праектаў у Беларусі каля $570 млн. Пра гэта паведаміў кіраўнік прадстаўніцтва Сусветнага банка ў Беларусі Алекс Крэмер на прэзентацыі рамачнай стратэгіі партнёрства Групы СБ для Беларусі на 2018-2022 гады.
„Мы ацэньваем, што фінансаванне з боку Сусветнага банка з 1 ліпеня 2018 года да 31 чэрвеня 2022 года будзе каля $570 млн. Лічбы могуць быць вышэйшыя або ніжэйшыя ў залежнасці ад розных аспектаў і падзей”, – сказаў Алекс Крэмер.
Сярод асноўных напрамкаў фінансавання – рост прыватнага сектара, павышэнне эфектыўнасці дзяржсектара, мадэрнізацыя сацыяльных паслуг. Алекс Крэмер адзначыў, што Сусветны банк задаволены ходам рэалізацыі ў Беларусі бягучых праектаў. „Беларусь з’яўляецца адной з больш эфектыўных краін у частцы рэалізацыі праектаў у сваім рэгіёне”, – лічыць ён.
Спецыяліст па праграмах Сусветнага банка ў Беларусі Ірына Алейнік нагадала, што пры рэалізацыі папярэдняй стратэгіі аб’ём фінансавання вырас практычна ў два разы – з $457 млн да амаль $1 млрд. Гэта звязана з тым, што тады пачалася рэалізацыя праектаў па новых напрамках. Новая стратэгія на 2018-2022 гады прадугледжвае ў тым ліку фінансаванне праекта па мадэрнізацыі сістэмы кіравання дзяржаўнымі фінансамі, дадатковае фінансаванне для праекта па мадэрнізацыі сістэмы адукацыі, выдзяленне сродкаў для праектаў па ўмацаванні сістэмы вышэйшай адукацыі, па падвышэнні эфектыўнасці і якасці камунальных паслуг, па падвышэнні ўстойлівасці энергетычнага сектара.
Глядзіце таксама
