Што рабіць з помнікам Леніна ў Гародні?
Больш за 30 год таму ў 1987 годе ў Гародні перыяду СССР на плошчы з’явіўся помнік Леніну. Помнік быў створаны скульптарам Заірам Азгурам. У 2018 годзе гарадзенцы на сайце Petitions.by збіраюць подпісы за дэмантаж гэтага помніка.
Кіраўнік партыі БНФ па Гарадзеншчыне Вадзім Саранчукоў кажа, што падтрымлівае гэту петыцыю:
– Дадзенаму помніку не месца не проста на цэнтральнай плошчы горада, а ўвогуле ў беларускіх гарадах. Гэта чалавек, які наўпрост не звязаны ні з горадам, ні з краінай. Чалавек, з чыёй дзейнасцю звязана столькі негатыву, проста не мае права стаяць на цэнтральнай плошчы. Безумоўна, напэўна ўзарваць гэты помнік не самы правільны варыянт. Я абсалютна падтрымліваю петыцыю з патрабаваннем дэмантажу помніка. Магчыма найлепшым варыянтам было б тое, як зрабілі нашыя суседзі літоўцы, калі падчас дэкамунізацыі, якая проста неабходная для Беларусі, усе помнікі былі звезеныя ў адзін парк.
Жыхары Гародні падчас вулічнага апытання выказалі розныя думкі наконт гэтага помніка:
– Даўно пара дэмантаваць. Тым больш стаіць на гістарычным месцы. Лепш Тызенгаузу паставілі б вялікі помнік.
– Маё асабістае меркаванне, яго трэба пакінуць. Гэта частка нашай гісторыі, частка нашага жыцця. Ён павінен застацца на сваім месцы.
– Давайце тады дэмантаваць усе гістарычныя помнікі.
– Я думаю, што можна дэмантаваць, і паставіць замест старога сімвалу нешта новае. Напрыклад, помнік Кастусю Каліноўскаму.
Ужо сабрана больш за пяць соцень подпісаў і апроч подпісаў на сайце гарадзенскія актывісты будуць збіраць і папяровыя подпісы на вуліцах гораду.
Беларускае Радыё Рацыя, Гародня
Фота grodno.in
Глядзіце таксама
