У Наваградку адмовіліся называць вуліцу імем Барыса Кіта
У Наваградскім райвыканкаме палічылі немэтазгодным пераймяноўваць вуліцу ў гонар беларускага навукоўца Барыса Кіта. Такі адказ даў старшыня выканкама Анатоль Маркевіч на петыцыю, якая сабрала амаль паўтысячы подпісаў, паведамляе Радыё „Свабода”. Падпісанты прасілі пераназваць у гонар Кіта адну з цэнтральных вуліцаў — Савецкую.
„Перайменаванне вуліцы цягне за сабой замену пашпартоў грамадзянаў, якія пражываюць на гэтай вуліцы, тэхнічных пашпартоў і іншых дакументаў, якія патрабуюць пэўных матэрыяльных выдаткаў”, — гаворыцца ў адказе Маркевіча.
Чыноўнік падкрэслівае, што памяць пра славутага земляка ў Наваградку заховаецца іншым чынам: Барыс Кіт названы ганаровым грамадзянінам горада, яго імя занесенае ў Кнігу славы Наваградскага раёна, у школе № 1 ёсць яго музей, 19 гадоў запар праходзіць інтэлектуальны турнір яго імя.
Тым часам у Баранавічах пачаўся збор подпісаў за наданне тамтэйшаму ўніверсітэту імя Барыса Кіта.
Барыс Кіт нарадзіўся ў 1910 годзе ў Санкт-Пецярбургу. Пасля кастрычніцкага перавароту 1917 года яго бацька перавёз сям’ю ў вёску Агароднікі Карэліцкага раёна. Кіт скончыў Віленскі ўніверсітэт імя Стэфана Баторыя, выкладаў матэматыку і быў дырэктарам Віленскай беларускай гімназіі, пазней — Наваградскай гімназіі. У 38 гадоў эміграваў у ЗША. Удзельнічаў у амерыканскіх праектах падрыхтоўкі да палётаў у космас, даследаваў касмічныя праграмы СССР. Прафесар, доктар матэматыкі, акадэмік Міжнароднай акадэміі астранаўтыкі, сябра многіх міжнародных і нацыянальных акадэмій і аб’яднанняў.
Навуковец памёр 1 лютага 2018 года на 108-м годзе жыцця. Пахаваны ў нямецкім Вісбадэне.
Глядзіце таксама
