У Львове беларусы размаўляюць на роднай мове
Намеснік начальніка ўпраўлення турызму Львоўскага гарсавета Галіна Грынюк распавяла, чаму Львоў па-ранейшаму застаецца прывабным месцам для турыстаў, але іх колькасць зменшылася.
Галіна Грынюк: Львоў заўсёды цудоўна працаваў з беларускімі турыстамі, але ў апошні час іх колькасць зменшылася. А яшчэ год таму аўтобусы з беларусамі ішлі і ішлі. Тут жа шмат чаго можна паглядзець. Сам старажытны горад, яго наваколлі… Львоў па-ранейшаму прываблівае турыстаў, але менш стала групавых тураў і больш індывідуальных. Турфірмы ўсё ж баяцца везці турыстаў на тым жа аўтобусе, напалоханыя чуткамі ў СМІ, што на дарозе могуць абрабаваць, патрапіць у непрыемную сітуацыю. Да таго ж, наколькі вядома, беларускім турыстам не рэкамендавана ездзіць ва Украіну. А індывідуалы садзяцца на цягнік, прыязджаюць і спакойна адпачываюць. “Бандэраўцы” іх тут не ядуць. Да таго ж зараз мы адзначаем такую тэндэнцыю, што ў Львоў стала прыязджаць больш украінскіх турыстаў. Пашырыўся ўнутраны турызм. Львоў – гэта такі востраў свабоды.
РР: Сёння ў Львове спакойна?
Галіна Грынюк: Абсалютна! Усё спакойна, ніякай агрэсіі. Вы можаце нешта запытацца на рускай мове – вам ласкава адкажуць і пакажуць усё, што трэба. Так, тут многія аддаюць перавагу сваёй роднай украінскай мове, але што ў гэтым дрэннага ці незвычайнага? Вы ж не будзеце здзіўляцца, калі прыедзеце ў Японію і сустрэнеце мясцовых жыхароў, якія размаўляюць на японскай мове. Дарэчы, вось цікавы факт. Беларусы, якія прыязджалі да нас, распавядалі, што дома яны практычна не размаўляюць на роднай мове, а ў Львове – гэта для іх норма. Па-першае, ніхто не глядзіць скоса, па-другое – так лепш разумеюць мясцовыя.
РР: Наколькі скараціўся паток беларускіх турыстаў у Львоў?
Галіна Грынюк: Дакладна нельга сказаць, бо падлік вядзецца па тым, колькі чалавек звярнулася ў гарадскі турстычны інфармацыйны цэнтр. Але ж многія наогул туды не звяртаюцца. Тым не менш, скарачэнне відавочнае з водгукаў нашых турыстычных фірмаў, якія супрацоўнічаюць з Беларуссю. Хоць, паўтаруся, беларускія турысты ўсё роўна едуць. Зараз да турызму дадаўся і той фактар, што ў тым жа Львове ўсё можна купіць танней, нават чым у той жа Літве. Грыўна абвалілася, а цэны ў крамах не змяняюцца з той жа хуткасцю, што і дэвальвацыя. Таму многія беларускія турысты сумяшчаюць прыемнае з карысным – экскурсіі з шопінгам.
Кастусь Заблоцкі, Беларускае Радыё Рацыя
Фота аўтара
Глядзіце таксама
