Надзея Астапчук не выключае вяртання ў вялікі спорт
“Калі я яшчэ патрэбна зборнай”, – кажа вядомая спартсменка.
Нагадаем, што штурхальніца ядра Надзея Астапчук заваявала залаты медаль на Гульнях-2012, але яе допінг-проба дала станоўчы вынік. Быў вялікі скандал, медаль давялося вярнуць.
Беларуская федэрацыя лёгкай атлетыкі прыняла рашэнне аб 4-гадовай дыскваліфікацыі спартсменкі.
Тэрмін дыскваліфікацыі Астапчук пачаў адлік з 8 жніўня 2012 года. У гэты ж дзень у 2016 годзе Надзея зможа зноў выйсці ў сектар і нават тэарэтычна прыняць удзел у Гульнях у Рыа.
Надзея Астапчук: Я не выключаю варыянт вяртання ў вялікі спорт, калі будзе падтрымка і гэта будзе некаму патрэбна.
РР: Хто павінен вам працягнуць руку ў першую чаргу?
Надзея Астапчук: Думаю, Беларускай федэрацыі лёгкай атлетыкі неабходна праявіць ініцыятыву, калі я яшчэ патрэбна зборнай. А не проста выкрасліць з гісторыі, як кепскі ўспамін.
РР: Тэарэтычныя шанцы прыняць удзел у Алімпіядзе-2016 у вас застаюцца?
Надзея Астапчук: Няма ніякіх шанцаў. Беларуская федэрацыя так “удала” мяне дыскваліфікала, што пасля заканчэння тэрміну пакарання я нават не паспею прайсці адбор на Гульні. Хіба што цяпер можна абскардзіць дыскваліфікацыю, каб яе зменшылі хаця б на паўгода. Тады яшчэ можна пра штосьці казаць. Але ў гэтым павінен быць зацікаўлены беларускі бок, нашы спартыўныя чыноўнікі. Пакуль я нічога такога не бачу.
РР: Думаеце, хопіць сілаў вярнуцца ў вялікі спорт пасля чатырохгадовай дыскваліфікацыі?
Надзея Астапчук: А чаму б і не? Зараз я ядро не штурхаю, але форму падтрымліваю.
РР: Чым яшчэ зараз займаецеся?
Надзея Астапчук: Як давядзецца, бо пастаяннага месца працы ў мяне няма. У свой час уклала грошы ў невялікі бізнес, так што на жыццё хапае.
Кастусь Заблоцкі, Беларускае Радыё Рацыя
Фота
Глядзіце таксама
