Поўнакантактны конны турнір стане эксклюзівам „Нашага Грунвальду” ў Дудутках
Упершыню ў гісторыі сучаснай Беларусі 22 ліпеня пройдзе поўнакантактны конны турнір на суцэльнадраўляных коп’ях з усім цырыманіялам па правілах XV стагоддзя.
Ён стане адным з эксклюзіваў праграмы X Міжнароднага фестывалю сярэдневяковай культуры і музыкі „Наш Грунвальд” у Дудутках, паведаміў адзін з ініцыятараў і арганізатараў фестывалю Аляксандр Рак.
„Раней на фестывалі была толькі тэатралізацыя коннага турніру, у якой дэманстраваліся навыкі валодання кап’ём, майстэрства наезніка. Цяпер жа, упершыню ў гісторыі сучаснай Беларусі будзе рэканструяваны поўнакантактны конны турнір. Адрозненне ад іншых такіх спаборніцтваў, якія праходзяць на тэрыторыі рэспублікі, у тым, што ў гэтым выпадку будуць змагацца рыцары ў даспехах XV-XVI стагоддзяў і на паўнацэнных, доўгіх коп’ях з каранелем (плоскай металічнай плашкай) замест баявога наканечніка”, – растлумачыў Аляксандр Рак.
Такая традыцыя называецца джостынг (коннае збіванне на коп’ях), менавіта яе многія бачылі ў фільмах, прысвечаных эпосе рыцарства. У рэальным жыцці беларусы, паводле слоў Аляксандра Рака, не бачылі такога ўжо гадоў 600. Сутнасць турніру ў тым, што два коннікі ў поўным камплекце даспехаў нясуцца адзін на аднаго ўздоўж так званай лініі джостар. Гэта драўляная агароджа, якая раздзяляе рыцараў. Праціўнікі накіроўваюць адзін на аднаго коп’і, імкнучыся выбіць апанента з сядла.
„Гэта даволі небяспечная, экстрэмальная дысцыпліна. Бываюць выпадкі сур’ёзных траўмаў. Таму займацца такім могуць толькі вельмі добра падрыхтаваныя байцы. Акрамя таго, гэта дарагое хобі: каб набыць поўную амуніцыю, пастаянна трэніравацца, патрэбны дзясяткі тысяч долараў. У свеце набярэцца, напэўна, толькі пара дзясяткаў конных рыцараў. Да нас прыедуць 6 або 8 удзельнікаў. У Беларусі на гэты момант цалкам гатовы да турніру адзін рыцар, яшчэ два на падыходзе – ім трэба дарабіць даспех, які цалкам ахавае ад магчымых асколкаў кап’я пры ўдары. Астатнія ўдзельнікі плануюць прыехаць да нас з Расеі”, – дадаў Аляксандр Рак.
Коней для спаборніцтваў расейскія госці прывязуць сваіх, у беларускіх рыцараў таксама ёсць падрыхтаваныя коні. „Наогул, у такім турніры ў коней быў даспех – ахова галавы і грудзей. Але ў нашым выпадку неабходнасці ў гэтым няма, таму што джостар, які раздзяляе коннікаў, будзе 1,8 м вышынёй, што выключае траўмы для коней. Бяспеку людзей, акрамя іх саміх, будзе гарантаваць дасканалая падрыхтоўка. На турніры будзе дзяжурыць брыгада медыкаў”, – сказаў Аляксандр Рак. Ён адзначыў, што ў свеце для правядзення такіх турніраў патрабуюцца сур’ёзныя допускі.
Таму да гэтага часу на суцэльнадраўляных коп’ях спаборніцтвы праводзіліся толькі ў ЗША, Францыі і Аўстраліі. Беларусь будзе чацвёртай краінай. І калі турнір удасца, гэта створыць прэцэдэнт, які дазволіць у наступным годзе пашырыць геаграфію ўдзельнікаў. Бязвізавы рэжым паслужыць для гэтага дадатковым стымулам.
А пакуль у Дудутках будуецца джостар з паласой разгону коней даўжынёй 38 м, афармляюцца дзве трыбуны для гледачоў. Кожная з іх умяшчае да 300 чалавек, яшчэ некалькі соцень змогуць назіраць за боем вакол пляцоўкі. Цікавасць усяму відовішчу надасць і маляўнічы цырыманіял: выхады герольдаў, паказ рыцараў з вынасам гербаў, сцягоў, суправаджэнне збраяносцаў, судзейства.
Х Міжнародны фестываль сярэдневяковай культуры і музыкі „Наш Грунвальд” пройдзе 21-22 ліпеня ў музейным комплексе ў Дудутках. Галоўнай падзеяй стане рэканструкцыя Грунвальдскай бітвы. На працягу двух дзён на тэрыторыі комплексу пройдуць рыцарскія турніры ў пешым страі ў фармаце „шчыт-меч”, турнір алебардыстаў і капейшчыкаў, турнір лучнікаў, масавыя бітвы (бугурты) і „Бітва Двароў”.
Са сцэны гасцей будуць забаўляць вясёлымі і рамантычнымі напевамі і рытмамі лепшыя фолк- і рок-калектывы Беларусі, Расеі і краін Еўропы. Пройдуць майстар-класы па сярэдневяковых танцах і рамёствах, будзе працаваць горад майстроў, інтэрактыўныя пляцоўкі, майстэрні па вырабе даспехаў, ліцці ювелірных вырабаў, апрацоўцы каменя, вырабе зброі, плаўцы руды, фарбаванні тканін, ганчарныя і кавальскія майстэрні. Арганізатарамі фестывалю выступаюць Экстрым-тэатр „Берсерк”, Аляксандр Рак і музейны комплекс старадаўніх народных рамёстваў і тэхналогій „Дудуткі”.
