Terra Incognita Белыя Балоты
Год таму ў вёсцы Белыя Балоты, якая знаходзіцца ў турыстычных абшарах Аўгустоўскага канала Гарадзеншчыны, пачаліся рамонтныя працы сядзібы роду Сабалеўскіх-Тукалаў. Рамонт ажыццяўляе вытворчы кааператыў „Зарэчны-Агро”. Ужо бачныя пэўныя станоўчыя вынікі пераменаў у абліччы гэтага помніка. Фасад дома ашчадна адрамантаваны. Калі судзіць па ўяздной пляцоўцы, то цяпер там вядуцца работы, але не актыўна. У адной з заляў з’явілася новая мэбля. Сядзіба павінна была ператварыцца ў клуб адпачынку.
Трапіць унутр памяшкання нам не ўдалося, але вонкава дом выглядае прыстойна. Рамонтнікі захавалі старую сталярку на брылі ганку. Спадзяемся, што старая, разная сталярка захавалася ў самім будынку.
Асобная і невясёлая думка ўсплывае пры аглядзе гэтага помніка гісторыі і прыроды пры наведванні эклектычнага парка, які прымыкае да дома. Пейзажны стыль парка, яго зліццё з навакольнай прыродай рамонтнай арганізацыяй разумеюцца па-свойму. Сярод заваленых дрэваў ды крапівы па пояс, завалаў у рачулцы, не відаць праяваў дзейнасці чалавека.
Не відаць нават сцежак, апрача адной праз рачулку, праз якую перакінутая труба, замест кладкі. А ў часы гаспадароў Тукалаў у парку быў разбіты вялікі разарыум з больш як ста ружаў, быў звярынец, а самі балоты навокал засаджаныя белымі лілеямі.
На інфармацыйнай шыльдзе перад сядзібным домам пазначана, што змены відавога складу, санітарных прарэджванняў і рэканструкцыі ў „парку” не дазваляюцца без узгаднення з Міністэрствам прыроды. Колькі часу яшчэ патрэбна, каб пачаліся працы ў парку?
Апрача Белых Балотаў раім вандроўнікам завітаць у Селіванаўцы. Гэта ў некалькіх кіламетрах ад сядзібы. Адна з уласніцаў, графіня Сабалеўская ў 1865—1867 гадах з’яўлялася фундатарам пабудовы касцёла ў Селіванаўцах, які стаў месцам радавога пахавання іх сям’і. Даехаць туды можна на добрай асвальтавай дарозе.
Агулам, дарога можа заняць дзве гадзіны на ровары. У мэтах бяспекі рэкамендуем ехаць аб’яздной дарогай праз Свяцк. Бо па простай дарозе, якая вядзе ад Гародні да Белых Балотаў праз Зарачанку, пачынае быць небяспечнай за вёскай Каўбаскі. У гэтым участку па дарозе ездзяць кар’ерныя самазвалы на недазволенай хуткасці.
Беларускае Радыё Рацыя
