Планы і квэсты планавай эканомікі
Хочаш рассмяшыць Бога – распавядзі яму пра свае планы! І ўсё ж мы спрабуем прарвацца (раскласці ўсё па палічках і распланаваць!)
Беларусь скарэктавала прагноз сацыяльна-эканамічнага развіцця на 2019 год, улічыўшы няпростыя жыццёвыя “абставіны” – адносіны з суседзямі і зніжэнне кошту на барэль нафты… Пра ўсё гэта распавёў у сваім інтэрв’ю тэлеканалу “СТВ” міністр эканомікі Дзмітры Крутой. Рост ВУП трохі зменшыўся, але сярэднегадавы заробак па краіне запланаваны ў раёне 1025 беларускіх рублёў (або 429 еўра). Прырост рэальных прыбыткаў насельніцтва запланаваны на ўзроўні 3,4%. У нас галоўнае што? Усё правільна – запланаваць!
Спачуваеш айчынным чыноўнікам – паспрабуй тут запланаваць штосьці! Прычым правільна запланаваць. Гэта ж у нас – выспа стабільнасці, а навокал – бяда! То адно зменіцца, то іншае: мовы, далягляды, тэмпературы, рэаліі, людзі… Усё цячэ – усё змяняецца. Суцэльны стрэс.
Урад сарыентаваўся ў плане заробкаў бюджэтнікаў і па пенсіях – працягваем афіцыйную хроніку. Хочацца верыць, што пенсіянеры і бюджэтнікі таксама сарыентаваліся. У плане ўраджаю (ён сёлета добры быў!) і назапасілі садавіны ды гародніны на доўгую зіму: урад урадам… Паказчыкі… Планы… Са сваімі нарыхтоўкамі перажыць халады будзе прасцей. І весялей.
Прэм’ер-міністр Беларусі Сяргей Румас нагадаў пра недапушчальнасць даводзіць паказчыкі прыватнаму бізнесу – працягваем разбіраць на цытаты навіны. Прыватнікі будуць спаць спакойна? Ведаючы, што хтосьці там, зверху, не будзе хвалявацца за іх і… пераключыцца на пенсіянераў? Нервовыя клеткі не аднаўляюцца. Пажывем – пабачым, бо калі хочаш рассмяшыць Бога, то… То і не будзем.