Лаўрэатам паэтычнай прэміі імя Наталлі Арсенневай стаў Алесь Разанаў (абноўлена)
Паэт Алесь Разанаў атрымаў прэмію імя Наталлі Арсенневай за кнігу вершаў „Перавыбранае”. Цырымонія адбылася 20 верасня ў Менску, у 115-ты дзень народзінаў паэткі. У шорт-лісце было 9 прозвішчаў. І амаль усе паэты выступілі са сваімі вершамі. Таму ўручэнне прэміі ператварылася ў вялікі паэтычны вечар.
Па словах Алеся Разанава, творцы не спаборнічаюць паміж сабою – яны асягаюць. Асягаюць вышыню, асягаюць далечыню.
– Гэтае асягненне – галоўны набытак кожнага творцы і паэзіі ў цэлым. Паэзія ідзе сваёй дарогай, сваім шляхам. У кожнага творцы свой адметны шлях. Я рады, што ў беларускай айчыннай паэзіі на сцэну трапляюць новыя імёны.
Прэмія імя Наталлі Арсенневай заснаваная ў 2017 годзе Саюзам беларускіх пісьменнікаў, Беларускім ПЭН-цэнтрам і Згуртаваннем беларусаў свету „Бацькаўшчына” пры спрыянні Фонда культуры і адукацыі Орса-Рамана і Харытатыўнага фонда Згуртавання беларусаў Вялікабрытаніі.
У мінулым годзе яе першым лаўрэатам стаў паэт Уладзімір Някляеў за кнігу „Толькі вершы”.
Цалкам матэрыял:
Генадзь Барбарыч, Беларускае Радыё Рацыя, Менск
* * *
Лаўрэатам паэтычнай — 2018 стаў Алесь Разанаў з кнігай „Перавыбранае” („Выдавецтва Змітра Коласа”, Менск). Пераможца быў абвешчаны 20 верасня на цырымоніі ў менскай кавярні „Грай”.
Акрамя Разанава ў гэтым годзе на перамогу прэтэндавалі:
Антон Францішак Брыль ( „Цмачанка”. Выдавецтва „Янушкевіч”, Менск);
Вальжына Морт ( „Эпідэмія ружаў”. Выдавецтва „Логвінаў”, Вільня);
Валянціна Аксак ( „Завінены рай”. Выдавецтва „Галіяфы”, Менск);
Вольга Гапеева ( „Граматыка снегу”. Выдавецтва „Галіяфы”, Менск);
Ігар Кулікоў ( „Валадар загадак”. Выдавецтва „Медысонт”, Менск);
Іна Снарская ( „Вогнепаклонніца”. Выдавецтва „Кнігазбор”, Менск);
Міхаіл Рубін ( „пераклад з Іншага”. „Выдавецкі рашэння” па ліцэнзіі Ridero);
Усевалад Сцебурака ( „Сны дарог”. Выдавецтва „Медысонт”, Менск).
У склад журы прэміі Арсенневай сёлета ўвайшлі паэт і перакладчык Андрэй Хадановіч, літаратуразнаўца і пісьменніца Вольга Іпатава, паэт і выдавец Дзмітрый Строцаў, паэтэса і перакладчыца Марыя Мартысевіч, паэтэса Наста Кудасава.
Па ўмовах конкурсу члены журы не мелі права галасаваць за кнігі, рэдактарамі якіх яны былі.
Прэмія заснавана ў 2017 годзе ў гонар беларускай паэтэсы Наталлі Арсенневай (1903—1997). Яна ўручаецца за лепшую паэтычную кнігу на беларускай мове, выдадзеную ў папярэднім годзе. Арганізатары прэміі — Беларускі ПЭН-цэнтр, Саюз беларускіх пісьменнікаў і „Згуртаванне беларусаў свету „Бацькаўшчына”. Узнагарода ўручаецца пры падтрымцы Фонду культуры і адукацыі Орса-Рамана і Харытатыўнага фонду” Згуртавання беларусаў Вялікай Брытаніі „.
Першым лаўрэатам прэміі імя Арсенневай стаў Уладзімір Някляеў за зборнік „Толькі вершы”.
У пачатку цырымоніі прысутныя ўшанавалі памяць заснавальніка інфармацыйнай кампаніі БелаПАН Алеся Ліпая, які раптоўна памёр 23 жніўня ў Менску на 53-м годзе жыцця. Яго кніга „Абдымкі” сёлета намінавалася на прэмію. На мерапрыемстве прагучалі вершы Алеся Ліпая.
Глядзіце таксама
