Тэрмін увядзення ў Беларусі біяметрычных пашпартоў перанесены на год
Тэрмін увядзення ў Беларусі біяметрычных дакументаў перанесены на 2020 год з-за неабходнасці інтэграцыі інфармацыйных сістэм. Пра гэта паведаміў газеце „Советская Белоруссия” намеснік начальніка ўпраўлення па грамадзянстве, пашпартнай рабоце і выездзе за мяжу дэпартамента па грамадзянстве і міграцыі МУС Павел Хрышчановіч.
Плануецца, што першыя дакументы новага ўзору — ID-карты і біяметрычныя пашпарты — можна будзе атрымаць 1 студзеня 2020 года, а не ў пачатку 2019 года, як планавалася раней.
„Да канца года да нас паступіць закупленае абсталяванне, і тэарэтычна мы маглі б запусціць працэс вытворчасці ID-карт і біяметрычных пашпартоў ужо з пачатку наступнага года. Аднак мы бачым, што ў гэтым пакуль няма сэнсу, бо, па сутнасці, гэта будзе толькі голы пластык”, — падкрэсліў прадстаўнік міністэрства.
Хрышчановіч адзначыў, што для ўвядзення ў абарачэнне ID-карт неабходна злучыць паміж сабой усе інфармацыйныя сістэмы, да якіх будуць мець доступ грамадзяне, але пакуль яны працуюць на розных платформах. „Сумесна з Міністэрствам сувязі і інфарматызацыі намі падрыхтавана дарожная карта па рэалізацыі гэтага праекта. Дакумент заняў 15 лістоў і выразна абазначыў, хто і якім чынам адказвае за пэўныя этапы працы па ўкараненні новай сістэмы ў жыццё”, — сказаў ён.
Дагавор аб пастаўцы абсталявання і праграмнага забеспячэння для вырабу ў Беларусі біяметрычных дакументаў падпісаны ў маі паміж Рэспубліканскім навукова-тэхнічным унітарным прадпрыемствам „Крыптатэх” дэпартамента дзяржаўных знакаў Міністэрства фінансаў і кансорцыумам Emperor Technology (КНР) і X Infotech (Латвія).
Фота: sputnik.by
Глядзіце таксама
