Сусветная шахматная Алімпіяда 2022 года пройдзе ў Беларусі
Сусветная шахматная Алімпіяда 2022 года пройдзе ў Беларусі. Такое рашэнне прынятае на пасяджэнні Генеральнай асамблеі Міжнароднай федэрацыі шахмат (FIDE), якое праходзіць у Батумі, паведамляе прэс-служба Міністэрства спорту і турызму.
Беларусь падала заяўку на правядзенне самага буйнога міжнароднага шахматнага турніру падчас пасяджэння прэзідэнцкага савета FIDE, якое ў красавіку гэтага года прайшло ў Менскай гарадской ратушы.
Заяўку на Генеральнай асамблеі абаранялі міністр спорту і турызму Беларусі Сяргей Кавальчук і старшыня Беларускай федэрацыі шахмат Анастасія Сарокіна. 4 кастрычніка яна была абраная віцэ-прэзідэнтам FIDE.
Наступная Сусветная шахматная Алімпіяда 2020 года адбудзецца ў Ханты-Мансійску.
Як звяртае ўвагу Мінспорту і турызму, Беларусь у найбліжэйшыя гады прыме некалькі буйных сусветных спартыўных падзей: у 2019-м — II Еўрапейскія гульні, ў 2021-м – чэмпіянат свету па хакеі, а ў 2022-м у Менску адбудзецца Сусветная шахматная Алімпіяда.
belapan.by
