5-я запар вікторыя берасцейскага „Дынама”
У суботу прайшлі тры матчы 24-га туру футбольнага чэмпіянату Беларусі. Ва ўсіх трох верх узялі фаварыты – клубы, якія прыехалі ў госці.
У Слуцку ФК „Віцебск” адолеў гаспадароў поля з лікам 2:0. Лёс сустрэчы вырашыўся яшчэ ў першым тайме, калі з інтэрвалам у 4 мінуты Кірыл Вяргейчык і Антон Матвеенка двойчы прымусілі капітуляваць брамніка случакоў Панкратава.
Аўтсайдар чэмпіянату – магілёўскі „Дняпро” не меў дома аніякіх шанцаў у гульні з берасцейскім „Дынамам” – 1:4. На галы Джоэала Фамее, Аляксандра Наёка, Паўла Савіцкага і Сяргея Крыўца гаспадары поля адказалі толькі адным трапным стрэлам Канцавога. Такім чынам зафіксавана ўжо пятая запар перамога берасцейцаў у чэмпіянаце.
Нарэшце ФК „Гомель” пры сваіх гледачах разгромна саступіў салігорскаму „Шахцёру” – 0:3. Гэты поспех гасцям прынеслі мячы Дзяніса Лапцева, албанскага легіянера Эліса Бакая і Паўла Рыбака.
Верхняя частка турнірнай табліцы на вечар 6 кастрычніка выглядала так:
1. БАТЭ – 57 ачкоў (22 гульні)
2. „Шахцёр” – 48 (23)
3. ФК „Віцебск” – 47 (23)
4. „Дынама” (Менск) – 45 (22)
5. „Дынама” (Берасце) – 41 (23)
6. „Нёман” – 38 (23). Беларускае Радыё Рацыя
