Статыстыка – царыца ўсіх навук
Белстат рапартуе: рэальныя грашовыя прыбыткі насельніцтва за студзень-жнівень бягучага года выраслі на 7,8% у параўнанні з аналагічным перыядам мінулага года.
Лічбы ўвогуле супакойваюць і дадаюць логікі ў наша жыццё, асабліва лічбы, старанна раскладзеныя па палічках статыстыкай. Што ж такое “рэальныя наяўныя грашовыя прыбыткі насельніцтва”? Гэта адзін з галоўных эканамічных паказчыкаў, па якіх вызначаецца дабрабыт грамадзянаў. Гэта грашовыя прыбыткі, не лічачы ўсемагчымых падаткаў і збораў, скарэктаваныя на індэкс спажывецкіх коштаў на тавары і паслугі.
Паводле Белстата, мы цяпер знаходзімся на пазітыўнай хвалі. Найбольш моцнае падзенне прыбыткаў за апошнія 10 гадоў беларусы перажылі ў 2016 годзе.
Тым часам беларускім пенсіянерам абяцаюць неблагое падвышэнне пенсій у самы бліжэйшы час. Урад рыхтуе прапанову пра рост выплат на 5%. З 1 лістапада.
Можна зірнуць на сярэднія пенсіі беларусаў тут і цяпер. Па-першае, яны налічваюць не больш за 37% ад сярэдняга ж заробку па краіне (улады плануюць давесці да 40 %). Па-другое, найбольшыя выплаты атрымліваюць жыхары сталіцы (чаго і варта было чакаць!), а найменшыя – жыхары Гарадзенскай вобласці (у нас не любяць заходнікаў?)
На развітанне можам падлічыць, ці шмат бульбы з’ядае кожны беларус і… супакоіцца. Лічбы супакойваюць, асабліва лічбы, правільна па палічках раскладзеныя.