Расея выдзеліць Беларусі крэдыт у 2019 годзе
Беларусь дамовілася з Расеяй аб выдзяленні расейскім бокам дзяржаўнага крэдыту ў 2019 годзе, паведаміў 12 лістапада журналістам міністр фінансаў Максім Ермаловіч.
Паводле яго слоў, адпаведнае рашэнне прынята, цяпер бакам неабходна падрыхтаваць адпаведнае пагадненне. Нейкія „новыя рашэнні” бакі „не чакаюць”, дадаў Ермаловіч.
Як паведамлялася раней, беларускі ўрад звярнуўся да ўрада Расіі з просьбай выдзеліць у 2019 годзе дзяржаўны крэдыт у 1 млрд долараў для рэфінансавання часткі знешняга доўгу, выплаты па якім у наступным годзе складуць 3,6 млрд долараў.
21 верасня па выніках сустрэчы з прэзідэнтам Расіі Уладзімірам Пуціным у Сочы Аляксандр Лукашэнка паведаміў: „Мы абмяркоўвалі пытанне аб рэфінансаванні доўгу ў 1 млрд долараў. І тут таксама непрымання не было ніякага”.
5 кастрычніка прэм’ер-міністр Сяргей Румас заявіў, што памер дзяржкрэдыту, які Беларусь разлічвае ў 2019 годзе атрымаць ад Расіі, цяпер узгадняецца бакамі. „У нас ёсць разуменне з урадам Расійскай Федэрацыі аб атрыманні гэтага крэдыту ў 2019 годзе, — сказаў ён. — Сёння мы абмяркоўваем суму гэтага крэдыту, таму што расійскі бок прапаноўвае рэфінансаваць толькі плацяжы, якія прыходзяцца толькі на адрас самой Расійскай Федэрацыі ў 2019 годзе. Беларуская бок прапаноўвае трошкі пашырыць і папрасіць РФ рэфінансаваць плацяжы, якія прыходзяцца на карысць ЕФСР (Еўразійскі фонд стабілізацыі і развіцця. — БелаПАН.)”. Румас дадаў, што разбежка паміж пазіцыямі бакоў нязначная. „Прынцыповае разуменне ёсць, пытанне гэта ў 2019 годзе будзе вырашана. У 2018 годзе мы яго не планавалі задзейнічаць”, — сказаў прэм’ер.
12 кастрычніка міністр фінансаў РФ Антон Сілуанаў паведаміў, што ў 2019 годзе Расія плануе разгледзець пытанне аб выдзяленні Беларусі крэдыту на рэфінансаванне раней выдадзенай пазыкі ў памеры 630 млн долараў.
Фота DW
