Правацэнтрысты плануюць правесці праймерыз
Беларускія правацэнтрысты (у кааліцыю ўваходзяць рух „За Свабоду”, Аб’яднаная грамадзянская партыя і аргкамітэт па стварэнні партыі „Беларуская хрысціянская дэмакратыя”) плануюць прыступіць у студзені 2019 года да пачатку рэалізацыі правядзення праймерыз па вызначэнні агульнага кандыдата ў прэзідэнты.
Згодна з заканадаўствам чарговыя выбары прэзідэнта павінны адбыцца не пазней за 30 жніўня 2020 года. Пра неабходнасць правядзення праймерыз для вылучэння агульнага кандыдата на іх прадстаўнікі правацэнтрысцкай кааліцыі заявілі ў канцы верасня.
У пачатку кастрычніка аргкамітэт БХД заявіў пра гатоўнасць вылучыць для ўдзелу ў праймерыз сустаршыню арганізацыі Паўла Севярынца. 15 снежня на справаздачнай-выбарчай канферэнцыі руху „За Свабоду” было прынята рашэнне пра верагодны ўдзел у праймерыз старшыні арганізацыі Юрыя Губарэвіча.
„Мы чакаем прозвішчы прэтэндэнта, якога са свайго боку назаве АГП. Пасля гэтага можна будзе пераходзіць непасрэдна да працэдуры правядзення праймерыз”, — паведаміў Губарэвіч.
„Тэхнічная частку ў рамках кааліцыі ўжо прагаворана, — сказаў ён. — Думаю, у выпадку спрыяльнага развіцця падзей, ужо ў пачатку 2019 года мы зможам паведаміць аб канкрэтным графіку, калі, як, у якіх рэгіёнах, у якой паслядоўнасці і ў якіх формах будзе праходзіць працэдура абрання адзінага кандыдата ад правацэнтрысцкай кааліцыі”.
Паводле яго слоў, прадстаўнікі кааліцыі рэгулярна праводзяць сустрэчы, „перамовы праходзяць паспяхова, падводных камянёў няма”. „Ёсць агульны настрой, што мы ідзем да агульнага выніку. Ёсць разуменне, што гэтая працэдура павінна нас узмацніць, а не раз’ядноўваць. Прыкметы канкурэнцыі паміж арганізацыямі будуць, але мы адказна паставімся і зробім усё магчымае, каб адзіны кандыдат меў падтрымку ўсіх структур кааліцыі”, — заявіў Губарэвіч.
Працэдуру маючага адбыцца праймерыз ён назваў адкрытай для іншых арганізацый. „Да ўсіх адказных арганізацый мы звяртаемся з заклікам далучацца да ўдзелу ў іх. Вядома, ёсць пэўныя рамкі, у якіх будуць названыя кандыдатуры. Натуральна, што прыхільнікі „рускага свету”або тыя, хто выступае супраць незалежнасці Беларусі і дэмакратычных рэформаў у ёй, не змогуць стаць часткай гэтай працэдуры”, — паведаміў палітык.
