Валянцін Стэфановіч: Гэта, канешне, перамога, але не да канца
Палата прадстаўнікоў адмяніла сумнавядомы артыкул Крымінальнага кодэксу 193.1, за дзейнасць ад імя незарэгістраваных арганізацыяў. За яго скасаванне шмат гадоў змагаліся праваабаронцы і іншыя прадстаўнікі грамадскай супольнасці.
Аднак, па словах сябра праваабарончага цэнтру „Вясна” Валянціна Стэфановіча, зроблена толькі палова крока.
– Ён быў адменены ў другім чытанні Палаты прадстаўнікоў. Застаецца зараз па працэдуры ўзгадненне Саветам Рэспублікі і падпісанне кіраўніком краіны. Можна, канешне, павіншаваць усіх нас і праваабарончую супольнасць таксама, якая ўсе гэтыя гады настойвала і шмат чаго рабіла для адмены гэтага артыкула. Але, на жаль, наш урад далёкі ад разумення сутнасці свабоды асацыяцый, паколькі з аднаго боку яны артыкул адмяняюць, але ўводзяць адміністрацыйную адказнаць за дейнасць ад імя незарэгістраваных арганізацый.
Адказнасць за гэта прадугледжвае штраф да 40 базавых велічынь. Па словах Валянціна Стэфановіча, і адміністратыўная адказнасць расцэньваецца праваабаронцамі як недапушчальнае парушэнне свабоды асацыяцый. Нельга караць толькі за адсутнасць рэгістрацыі тыя арганізацыі, якія не прадстаўляюць ніякай пагрозы грамадству і не робяць нічога супрацьпраўнага, – падкрэсліў праваабаронца.
Ён нагадаў, што пік рэпрэсіяў па артыкулу 193 прым прыйшоўся на 2006 – 2007 гады. Па дадзеных праваабаронцаў, было асуджана не меней 17 чалавек, у тым ліку былі пазбаўлены волі лідар „Маладога Фронту” Зміцер Дашкевіч, кіраўнікі і сябры арганізацыі па назіранню за выбарамі „Партнёрства” Мікалай Астрэйка, Эніра Браніцкая, Цімафей Дранчук і іншыя.
Генадзь Барбарыч, Беларускае Радыё Рацыя
